Jas ánshi Erjan Maksım halyqaralyq baıqaýdyń Gran-prı ıegeri atandy

ASTANA. QazAqparat – Qazaqstandyq jas ánshi Erjan Maksım Makedonııa astanasy Skope qalasynda ótken WAF CONTEST halyqaralyq baıqaýynyń bas júldesin jeńip aldy, dep habarlaıdy QazAqparat tilshisi.

Qazaq ulttyq óner ýnıversıteti mektebiniń estradalyq vokal boıynsha 9-synyp oqýshysy Erjan Maksım sonymen qatar jyl saıynǵy WAF AWARDS júldesine ıe boldy.

Ýnıversıtetten túsken málimetke qaraǵanda, bul eki jarysty Dúnıejúzilik festıvaldar qaýymdastyǵy ótkizedi. WAF ótkizgen ár túrli baıqaýlardyń belsendi qatysýshylary jyl qorytyndysyna sáıkes marapattalady.

Bul marapattar daryndy jastardyń tabys-jetistikterin dáriptep, olardyń shyǵarmashylyǵyn qoldaýǵa jáne nasıhattaýǵa baǵyttalǵan.

Bıylǵy jyly WAF CONTEST baıqaýynda Eýropa jáne Azııanyń 16 memleketinen, sonyń ishinde Qazaqstannan 32 qatysýshy baq synady.

Olardyń arasynan Erjan Maksım baıqaýdyń Gran-prı ıegeri atandy. Ol óziniń jeńisin Qazaqstanǵa, sondaı-aq Qazaq ulttyq óner ýnıversıtetine arnady. Bul ýnıversıtettiń bıyl toılanatyn 25 jyldyǵyna alǵashqy tartý boldy.

Atalǵan baıqaýǵa Qazaqstannan Erjanmen birge atyraýlyq Altynaı Tólegen de qatysyp, ol WAF AWARDS júldesine qosa ekinshi oryndy enshiledi.

«Qazir Erjan 15 jasta. Onyń Oralda bastalǵan ánshilik joly osylaısha tabysty jalǵasýda. Erteń Astanaǵa ushamyz», - dedi QazAqparat tilshisine Erjannyń anasy Gúlmıra Álibek.

Eske sala keteıik, budan buryn Erjan Maksımniń «Golos. Detı» baıqaýynyń jeńimpazy atanǵanyn jazǵan bolatynbyz.

Erjannyń keńinen tanymal bolýy dál osy baıqaýdan bastalǵan edi.