Jas analarǵa beriletin áleýmettik qoldaý Batys elderinde joq – Prezıdent
ASTANA. KAZINFORM – Áleýmettik saladaǵy mindettemelerdi oryndaý bıliktiń barlyq tarmaǵynyń konstıtýtsııalyq mindeti sanalady. Memleket basshysy Qasym-Jomart Toqaev medıtsına qyzmetkeri kúnine arnalǵan saltanatty is-sharada tegin medıtsınalyq kómektiń kepildendirilgen kólemi týraly pikir bildirdi.
Jańa Konstıtýtsııaǵa saı, Qazaqstan – áleýmettik memleket. Sáıkesinshe, áleýmettik saladaǵy mindettemelerdi oryndaý bıliktiń barlyq tarmaǵynyń, sonyń ishinde Úkimettiń konstıtýtsııalyq mindeti sanalady.
– Bul mindet tabysty oryndalyp jatyr. Ótken jyly tek respýblıkalyq bıýdjetten áleýmettik qajettilikterge 9 trıllıon teńgeden astam qarjy jumsaldy (shamamen 18 mıllıard dollar). Bul – óte qomaqty soma. Tegin medıtsınalyq kómektiń kepildendirilgen kólemi baǵdarlamasyn iske asyrý da konstıtýtsııalyq mindetteme aıasyna kiredi, – dep atap ótti Prezıdent.
Tegin medıtsınalyq qyzmetterdi qamtıtyn áleýmettik maqsattaǵy biregeı baǵdarlamanyń basqa elderde balamasy joq.
– Atalǵan baǵdarlama týraly Konstıtýtsııamyzǵa jazyldy, bul – konstıtýtsııalyq mindet. Muny memlekettiń naqty jetistigi retinde atap aıtqan jón. Názik jandy arýlarymyz dúnıege perzent ákelgennen keıin qandaı jeńildikterge ıe bolatynyn bilesizder: jumys orny saqtalyp, úsh jyl dekrettik demalysqa shyǵady, tıisti tólemder alady. Jas analarǵa óte jaqsy jaǵdaı jasalyp otyr. Men Batysta, atap aıtqanda, Shveıtsarııada jumys istegen kezde osy máseleni zerdeledim. Shveıtsarııada jáne basqa da Batys elderinde mundaı júıe joq, – deıdi Memleket basshysy.
Sonymen birge, ınnovatsııalardy qarqyndy túrde ıgerý, em-dom sharalarynyń joǵary standartyna kóshý, sondaı-aq baǵa men qyzmet sapasynyń teńgerimin saqtaý arqyly elimiz medıtsınalyq týrızmniń óńirlik ortalyǵy retinde tanylyp keledi.
Aıta keteıik, Aqordada Prezıdent medıtsına qyzmetkerlerin kásibı merekesimen quttyqtady. Elimizde maýsymnyń ər úshinshi jeksenbisi – medıtsına qyzmetkerleriniń kúni. Bul kúndi atap ótý QR Prezıdentiniń 1998 jylǵy Jarlyǵymen belgilengen.
Jańa Konstıtýtsııada «ult saýlyǵy» uǵymyna alǵash ret nazar aýdaryldy.
Prezıdent medıtsına qyzmetkerlerine kúsh kórsetken adamdardy qylmystyq jaýapkershilikke tartý týraly da pikir bildirdi.
Sondaı-aq, Memleket basshysy qoǵamdyq oryndarda ádep saqtaý máselesin kóterdi.
Bıyldyń ózinde medıtsına mamandarynyń jalaqysyn ósirýge 33 mıllıard teńge bólingen.
Al Astana medıtsına ýnıversıtetine Tóregeldi Sharmanovtyń esimi beriledi.
