Jas aqyndar jaýhar jyrlaryn Astanaǵa arnady

ASTANA. QazAqparat - Astana kúnin merekeleý is-sharalary keń aýqymda ótip jatyr. Elorda turǵyndary men qonaqtary qalanyń árbir saıabaǵynda, mádenı ujymdarda bolyp jatqan qyzyqty merekelik dýmandardy tamashalaý múmkindigine ıe bolýda.

Osy mereke aıasynda Astana qalasyndaǵy Ulttyq akademııalyq kitaphana birqatar is-sharalar uıymdastyrdy. Sonyń biri aqyndardyń Astanaǵa arnalǵan jyrlaryn jarııa etýine ulasty.

Kesh shymyldyǵyn belgili aqyn Baqytjan Tobaıaqov ashyp, óz óleńin oqyp berdi. Kelesi kezekte Sárýár Qamaeva, Aıbatyr Seıtaq, Ásem Erejeqyzy, Aýyt Muhıbek, Gúlishan Domalaıqyzy jyrdan shashý shashty.

Sondaı-aq osy keshte Astanadaǵy joǵary oqý ornynda oqyp júrgen jáne jýyrda elordaǵa qonys aýdarǵan jas aqyndardyń sahnaǵa shyǵyp, ózderiniń tyrnaqaldy týyndylarymen tanystyrǵanyn aıta ketkenimiz jón. Aıdana Segizbaeva, Álimjan Álisher, Kenjebek Serjanuly, Saıan Esjan mahabbat, jastyq shaq, aqqý týraly óleńderin oqydy. Jyrlarynda oı men kórkemdik, tyń izdenýshilik bary qýantty.

Osy jyr keshinde jas óner ıesi Azamat Ábdirahıev óziniń «Jaýyn» atty ánin alǵash ret oryndady. Sonymen birge Gúlnázııa Bısenova da ánnen shashý shashyp, sózi men sazyn ózi jazǵan «Ómirimniń máni» ánin shyrqady.

Kitaphananyń 6 jasar oqyrmany Gúlnazym óleńdi mánerlep oqyp berdi.

Ádebı-sazdy keshti júrgizgen aqyndar Marjan Ershý men Erlan Júnis te óz óleńderin tyńdarman nazaryna usyndy.