Jarystar joǵary deńgeıde uıymdastyryldy jáne ony abyroımen ótkizdik - Aq Azıadanyń tórt dúrkin jeńimpazy O.Novıkova
ASTANA. 10 aqpan. QazAqparat /Gúlmıra Álıakparova/ - Moraldyq daıyndyq turǵysynan 7-qysqy Azııa oıyndaryndaǵy jeńiske jetý ońaı bolǵan joq.
Sebebi júktelgen jaýapkershilik úlken boldy jáne bizden tek altyn medaldar kútildi. Bul oıymen búgin, Astana ákimi Imanǵalı Tasmaǵambetovtyń júrek jardy quttyqtaýlaryn qabyldap, páter kiltin alǵan 7-Azııa oıyndarynyń tórt dúrkin chempıony Olga Novıkova bólisti.
«Shynymdy aıtqanda, moraldyq daıyndyq turǵysynan jeńiske jetý ońaıǵa soqqan joq. Sebebi júktelgen jaýapkershilik úlken boldy jáne bizden tek altyn medaldar kútildi. Bul oıyndarǵa tórt jyl boıy daıyndaldyq. Jarys kúnderi aýa raıy azdap kedergi jasady. Qar erip jatty, biraq ony basqa jaqtan tasyp, tósegendikten jarystar toqtatylǵan joq. Tek qatty tuman bolǵan kúni bıatlonshylardyń jarysy keıinge shegerildi. Meniń oıymsha, jarystar joǵary deńgeıde uıymdastyryldy jáne ony abyroımen ótkizdik», - dedi jeńimpaz.
O.Novıkova, jarys alańyndaǵy myqty qarsylastary retinde Qytaı men Ońtústik Koreıanyń sportshylaryn atap ótti. «Olar óte tájirıbeli. Birinshi kúni Kýzmına jeńilip qalyp úshinshi oryndy, koreılik qyz ekinshi oryndy ıelendi. Sondyqtan alǵashqy kúni kúmis medal ketip qalǵanyna qynjyldyq. Degenmen, «altyn» qolymyzda boldy», - deıdi ol.
Sondaı-aq Azııa chempıony, óz ata-anasy da sporttyń baǵdarlaý túrimen aınalysatyndyqtan, shańǵymen baǵdarlaýmen 10 jyl boıy, al jazǵy baǵdarlaýmen jastaıynan shuǵyldanatynyn aıtty.
Qazaqstan quramasy jarystarǵa daıyndyqtaryn Qazaqstan aýmaǵynan bólek, Bolgarııa, Avstrııa, Reseı jáne basqa da shet elderde ótkizedi. Biraq jas sportshynyń pikirinshe, búgingi kúni el aýmaǵynan shyqpaı jattyǵýǵa barlyq múmkindikter jasalǵan.
Jeńimpaz osy jylǵy naýryz aıynyń sońynda ótetin Álem chempıonatynda baq synaıtyn bolady. Odan keıingi jospary - Olımpıada oıyndaryna qatysý.
