Jarystan qaıtqan 20 balany Óskemenge apara jatqan avtobýs jolda buzylyp qaldy
Keshki saǵat 20:15 shamasynda Astana-Pavlodar respýblıkalyq tasjolyn patrýldeý barysynda «QazAvtoJol» qyzmetkerleri joldyń shetinde buzylyp turǵan avtobýsty baıqady.
Júrgizýshi Astanada sport týrnırine qatysqan 20 balany qaıta Óskemenge apara jatty.
Jolshylar kólik júrgizýshisine kómek kórsetip, ony eń jaqyn tehnıkalyq qyzmet kórsetý stantsııasyna apardy.
Olar avtobýstyń isten shyqqan qosalqy bólshegin jóndedi. Balalar bolsa jolshylardyń baqylaýynda boldy. Avtobýsta avtonomdy jylytý júıesi jumys istep turdy.
Jóndelgen kólik júrgizýshisi saparyn jalǵastyrdy. Júrgizýshi jolaýshylarǵa kórsetken kómegi úshin alǵys aıtty.
Esterińizge sala keteıik, respýblıkalyq tasjolda shtattan tys jaǵdaı týyndasa, kólik ıeleri 1403 qysqa nómiri boıynsha QazAvtoJoldyń táýlik boıy jumys isteıtin call-ortalyǵyna habarlasa alady.