Jarysqa bara jatqan voleıbolshy balalardy apatqa ushyratqan júrgizýshi sottaldy

AQTÓBE. QazAqparat – Aqtóbede jarysqa bara jatqan oqýshylar jol-kólik apatyna ushyrap, bir sportshy bala kóz jumdy, al jattyqtyrýshy es-tússiz kúıde. Búgin júrgizýshige qatysty sot úkimi shyqty, dep habarlaıdy QazAqparat tilshisi.

Іs Aqtóbe oblysynyń kámeletke tolmaǵandar isteri jónindegi mamandandyrylǵan aýdanaralyq sotynda qaraldy. Іs materıalyna súıensek, sottalýshy 2022 jyly 17 jeltoqsanda «Toyota Estima» avtokóligimen Shubarqudyq aýylynan Aqtóbe qalasyna shyqqan. Avtokólik salonynda jattyqtyrýshy jáne sport mektebiniń 2010-2011 jyly týǵan toǵyz oqýshysy bolǵan. Jolda júrgizýshi qaýipsizdikti saqtamaı, qarsy baǵytqa shyǵyp, eki ret aýdarylǵan. Jol-kólik oqıǵasynan 2 balaǵa ortasha aýyr, 4 balaǵa jáne sportshylardyń jattyqtyrýshysyna aýyr dárejedegi zııan keltirilgen. Al, 1 bala oqıǵa ornynda qaza tapqan.

Sottalýshy kinásin tolyq moıyndap, keshirim surady. Prokýror 2 jylǵa bas bostandyǵynan aıyrý jazasyn taǵaıyndaýdy surady. Sottalýshy sotqa deıin erikti túrde jábirlenýshilerge keltirigen moraldyq zııan esebinde aqshalaı ótemaqy tólegen. Sot úkimimen júrgizýshi kináli dep tanylyp, oǵan 2 jyl 6 aı merzimine bas bostandyǵynan aıyrý jazasy taǵaıyndaldy. Sottalǵannan jattyqtyrýshy paıdasyna 5 mıllıon teńge moraldyq zııan óndirildi

, - dep habarlady Aqtóbe oblysynyń kámeletke tolmaǵandar isteri jónindegi mamandandyrylǵan aýdanaralyq sotynyń baspasóz qyzmeti.

Sot úkimi zańdy kúshine engen joq.

Eske salsaq, oqıǵa byltyr jeltoqsan aıynda boldy. Aqtóbe-Bolgarka-Shubarqudyq tasjolynyń 68-shaqyrymynda Temir aýdanynyń 32 jastaǵy turǵyny júrgizgen «Toyota Estima» avtokóligi aýdaryldy. Kólik ishinde 11 adam boldy. Olar - voleıbol komandasynyń músheleri men jattyqtyrýshysy. Jol-kólik oqıǵasyna túsken tórt oqýshynyń jaǵdaıy aýyr, taǵy tórteýiniń jaǵdaıy ortasha aýyr kúıinde aýrýhanaǵa jetkizilip, em qabyldady. Osy oqıǵadan soń qylmystyq is qozǵalyp, tergeý júrdi.