Jarys kóligi avtorallı kórermenderin basyp óltirdi
ASTANA. QazAqparat - Shotlandııada ótken avtorallıde úsh adam qaza tapty. Jarys kólikteriniń biri joldan shyǵyp ketip, kórermender turǵan jaqqa qaraı ushqan, dep habarlaıdy Bı-bı-sı.
Apat keshe keshke, 31 mamyr kúni ataqty «Formýla-1» jarysynyń shotland shabandozy Djım Klarkty (Jim Clark) eske alýǵa arnalǵan jarys kezinde oryn aldy. Djım Klark 1968 jyly Germanııada ótken jarysta qaza tapqan bolatyn.
Kýágerdiń aıtýynsha, kólik aldymen bir jaǵyna qaraı qısaıyp ketse, sosyn ekinshi jaǵyna qısaıyp baryp, joldyń shetinde turǵan 4 adamǵa soqtyǵysqan.
Qutqarýshylardyń aqparaty boıynsha, zardap shekken bir adam Edınbýrgtegi koroldik aýrýhanaǵa jetkizilgen. Onyń jaǵdaıy aýyr.
Bul rallı kezindegi alǵashqy qaıǵyly oqıǵa emes. Osy oqıǵadan eki saǵat buryn taǵy bir kólik 5 adamdy qaǵyp ketken, olardyń bireýi aýyr jaraqat alǵan.
Bul oqıǵalardan keıin jarys toqtatyldy. Polıtsııa tergeý amaldaryn júrgizýde.
