Jarymjan jandar jasandy uryqtandyrýǵa arnaıy kvota bólýdi surady
ASTANA. QazAqparat - Astananyń «Táýelsiz ómir» DOS» qoǵamdyq birlestigi arbaǵa tanylǵan múgedekter úshin ekstrakorporaldy uryqtandyrýǵa (EKU) arnaıy kvota bólýdi surap otyr, dep habarlaıdy QazAqparat Elorda ınfo saıtyna silteme jasap.
«Táýelsiz ómir» DOS» qoǵamdyq birlestiginiń bas mamany Ardaq Otarbaev mundaı ótinishin máslıhatta ótken qoǵamdyq tyńdaýlar barysynda bildirdi.
«Bizdiń qoǵamdyq birlestiktiń músheleri negizinen arbaǵa tanylǵan múgedekter, tirek-qımyl músheleri zaqymdanǵan azamattar. Qazirgi kúni kóptegen arbadaǵy múgedekter belsendilik tanytyp, túrli salada jumys istep júr, sportpen de shuǵyldanady. Kóbi úılenip, otbasyn quryp jatyr. Bizde fızıkalyq jolmen bala súıe almaıtyn otbasylar bar. Osy oraıda EKU ortalyqtaryna múgedekterge arnalǵan arnaıy kvota bar ma?», - dedi Ardaq Otarbaev.
Qalalyq Densaýlyq saqtaý basqarmasynyń basshysy Kamaljan Nadyrovtyń aıtýynsha, Astanada bala súıe almaıtyn otbasylarǵa jyl saıyn 50-ge jýyq kvota bólinedi.
«Kvota bar. Biraq ol bárine birdeı jete bermeıdi. Astanaǵa jylyna 50-ge jýyq kvota bólinedi. Al ol jeńildikke ıe bolǵysy keletinder sany birneshe myń. Jeńildikti bólý kezinde úmitkerlerdi irikteý kezinde múgedek nemese múgedek emes dep bólip-jarmaımyz. Naqty medıtsınalyq kórsetkishter bar: EKU tsıklynyń sáttiligin anyqtaıtyn arnaıy kórsetkishter bar. Sol kórsetkishterdi baǵalaı kele, biz tizimdi bekitemiz. Ol úshin arnaıy komıssııa bar», - dedi Kamaljan Nadyrov.
Buǵan qosa basqarma basshysy EKU kvotasyn bóletin komıssııa quramyn keńeıtip, adamdar kezegi elektrondy formatqa kóshiriletinin aıtty.
«Kezekti elektrondy formatqa kóshirip, onlaın rejımde baqylap otyratyn bolamyz. Bul máseleni qarastyrýǵa daıynbyz. Biraq kvota óte az», - dedi ol.
