Jarylystar, bala urlaý, óltirý syndy jalǵan aqparat taratqan azamattar jaýapkershilikke tartylady - QR Bas prokýratýrasy
TANA. 9 qarasha. QazAqparat - Jarylystar, bala urlaý, óltirý syndy jalǵan aqparat taratqan azamattar jaýapkershilikke tartylady. Bul týraly búgin Bas prokýratýranyń resmı ókili Nurdáýlet Súıindikov málim etti.
«Sońǵy kúnderi jarylystar, sondaı-aq balalardy urlap ketý, óltirý týraly jáne qoǵamdyq tártip pen qaýipsizdikti qamtamasyz etýdegi qıyn jaǵdaı jaıyndaǵy úreıli jalǵan habarlar úlken qoǵamdyq rezonansqa ıe boldy. Bul rette, quqyq qorǵaý organdarynyń osy málimetterdiń barlyǵyn buqaralyq aqparat quraldary arqyly jedel teriske shyǵaryp otyrǵandaryn atap ótken jón», - dedi ol.
Osyǵan baılanysty, Bas prokýratýra taratylǵan sybystardyń birde-biriniń shyndyqqa janaspaıtynyn jáne anyq jalǵan aqparat bolyp tabylatynyn resmı túrde habarlaıtyndyǵyn atap ótken ol: «Qazirgi tańda quqyq qorǵaý organdary árbir faktini tekserýde jáne jalǵan habarlar taratýǵa ári jaǵdaıdy turaqsyzdandyrýǵa kináli adamdar zańmen belgilengen jaýapkershilikke tartylatyn bolady», - dedi resmı ókil.
Onyń atap ótýinshe, elimizdiń quqyq qorǵaý organdary qoǵamdyq qaýipsizdikti qamtamasyz etý, halyqtyń ómiri men densaýlyǵyna tóngen qaýipti boldyrmaý jóninde turaqty negizde túbegeıli sharalar qabyldaýda. «Qajettilik týyndaǵan kezde, qoǵamdyq qaýipsizdikke baılanysty aqparattardy biz halyqqa kommýnıkatsııanyń barlyq qoljetimdi arnalary arqyly jedel jetkizetin bolamyz», - dedi N.Súıindikov.
