Jarylystan jaraqat alǵandardyń ishinde jergilikti turǵyndar joq – ákim
NUR-SULTAN. QazAqparat – Jambyl oblysynyń Baızaq aýdanyndaǵy jarylys saldarynan zardap shekken 28 naýqas Taraz qalasyndaǵy aýrýhanada em alyp jatyr. Іshinde tórteýiniń jaǵdaıy ortasha aýyr, dep habarlaıdy QazAqparat tilshisi.
Bul týraly oblys ákimi Berdibek Saparbaev BAQ ókilderine bergen suhbatynda aıtqan.
«Qazirgi tańda Taraz qalalyq ortalyq aýrýhanada 28 naýqas emdelip jatyr. Onyń tórteýiniń jaǵdaıy ortasha aýyr. Olarǵa qajetti barlyq medıtsınalyq kómek kórsetilýde. Ómirine eshqandaı qaýip tónip turǵan joq. Dári-dármek pen dárigerler jetkilikti. Jalpy, medıtsınalyq kómekke júgingen túrli deńgeıde jaraqat alǵan 98 adamnyń ishinde qarapaıym turǵyndar joq. Barlyǵy - áskerıler men tótenshe jaǵdaı salasynyń qyzmetkerleri», - dedi aımaq basshysy.
Sondaı-aq, ol habarsyz ketken áskerıler men qutqarýshylardyń ata-analarymen, týǵan-týysqandarymen kezdesip, izdeý jumystary qalaı júrip jatqanyn aıtty.
«Іzdeý jumystaryna áskerıler, TJD mamandary, kınologtar, tıisti mamandar, qyzmettik ıtter, atty adamdar jumyldyrylǵan. Arnaıy dron qurylǵysynyń múmkindigi de barynsha paıdalanylýda. Qazirgi tańda 180 adam, 40 shaqty tehnıka jumys isteýde», - dep jazady oblys ákiminiń baspasóz qyzmeti.
Berdibek Saparabevtyń aıtýynsha, oqıǵa jaqyn jerdegi temirjoldar men avtojoldar qalypty rejımde jumys isteı bastaǵan. Turǵyndardyń bári úılerine oralǵan. Tek baspanasy kúrdeli jóndeýden ótetin Qaınar aýylynyń turǵyndary ǵana ýaqytsha baspanamen, azyq-túlikpen qamtamasyz etilgen.
Sondaı-aq, oblys ákimi Jarylystan búlingen úılerdiń bári 2 aıda qalpyna keltiriletinin aıtty.
Jóndeýdi qajet etedi delingen 106 úıdiń 35-ine kúrdeli jóndeý taǵaıyndalyp otyr. Oblystyq jedel shtab qalǵan 71 úıdi jeńil zaqymdaldy dep tanyǵan. «Olar da qalpyna keltiriledi. Barlyq jumystarǵa Úkimet tarapynan qaralatyn jáne jergilikti bıýdjetten qosymsha bólinetin qarajat jumsalady. Óńirdegi demeýshiler de qarjylaı kómek kórsetedi. Búgin bir úıdiń kúrdeli jóndeý jumystary bastaldy.Qalǵan úılerde qurylysshylar erteńnen bastap iske kirisedi. Eki aıdyń ishinde barlyq úılerdi qalpyna keltiremiz dep ózimizge mindetteme alyp otyrmyz. Oǵan bizdiń múmkindigimiz de, qurylysshylar kúshi de jetkilikti»,-dedi oblys ákimi.
