Jarylystan bir mınýt buryn: Polıtseıler órtenip jatqan júk kóliginen úsh adamdy qutqardy
TALDYQORǴAN. QazAqparat - Almaty oblysynyń polıtseıleri jol apatyna ushyrap, órtenip jatqan júk kóliginen úsh adamdy shyǵaryp úlgerdi. Sálden keıin jarylys bolǵan, dep habarlaıdy QazAqparat tilshisi.
Esterińizge sala keteıik, 27 mamyr kúni Almaty-Bishkek avtojolynda «Toyota Land Cruser-100» avtokóligi men «Mersedes Benz-817» markaly júk kóligi soqtyǵysqan.
Eki kólik órtenip, bir adam qaza tapty. «Almaty-Bishkek» avtojolynyń 137 shaqyrymynda bolǵan apat ornyna kelgen patrýldik polıtsııa qyzmetkerleri órtengen júk kóliginiń júrgizýshi men eki jolaýshyny qutqaryp qaldy.
«27 mamyrnda patrýldik polıtsııa ekıpajy quramyndaǵy aǵa leıtenant Ardaq Eruzaqov pen leıtenant Dıas Kebekov saǵat 23.10-dar shamasynda «Almaty-Bishkek« avtojolynan batysqa qaraı 3 shaqyrym jerde bolǵan jol apaty týraly habar alyp, oqıǵa ornyna barǵan.
Janyp jatqan kólikterdi kórip, tártip saqshylary oılanbastan adamdardy qutqarýǵa kirisken. Olar júk kóliginiń júrgizýshisi otyratyn jaqqa jete almaǵan, sebebi jeńil avtokólikti oraǵan jalyn júk kóligin sharpı bastaǵan.
Kabınada qalyp qoıǵan jaraly júrgizýshi men eki jolaýshy ózdiginen kólikten shyǵa almaǵan. Polıtsııa qyzmetkerleri oqıǵa ornynda bolǵan eki jigitpen birge, maıysyp qalǵan jolaýshy esigin kúshpen ashyp aldymen eki jolaýshyny, sodan keıin júrgizýshini syrtqa shyǵarǵan. Júrgizýshini qutqarý qıyn bolǵan. Sebebi ony qaýipsizdik beldigin bosatýǵa týra kelgen. Zardap shekkenderdiń barlyǵy evakýatsııalanǵan kezde, jeńil avtokóliktiń gaz ballony jarylyp, júk kóliginiń kabınasyna tolyq otqa oranǵan. Al dál sol jerde bir mınýt buryn ǵana adamdar bolǵan», - dedi Almaty oblysy PD Jol-patrýldik polıtsııa batalonynyń komandıri Nurlan Ysqaqov.
Oqıǵa ornyna jetken qutqarýshylar zardap shekken adamdardy jaqyn mańdaǵy medıtsınalyq mekemege jetkizdi.
«Ókinishke oraı, «Toyota Land Cruser-100« júrgizýshisi Jambyl oblysynyń 67 jastaǵy turǵynyn qutqarý múmkin bolmady. Osyǵan oraı, basshylyq pen jeke quram atynan jaqyndaryna kóńil aıtamyz», - dedi Nurlan Ysqaqov.
