Jarylys kezinde jumys ornyn tastamaǵan arystyq: Kásipke adaldyq kerek
Kóp jyldardyn beri bankte kúzetshi bolyp jumys isteıtin Pernehan Bekmyrzaev jan-jaqta jarylys bolyp jatqanda, jumys ornyn tastap ketpegen.
«Biz tártip boıynsha basshylyqtyń ruqsatynsyz eshqaıda ketpeýimiz kerek. Óıtkeni ózińiz bilesiz, banktiń jumysy óte jaýapty. Sondyqtan da men jarylys bolyp jatqan kezde, qaýipti bilsem de óz jumys ornymda bolyp, basshylyqtan nusqaýlyq kúttim»,- deıdi Pernehan Bekmyrzaev.
Arystyq turǵyn óziniń bul isin batyrlyq dep eseptemeıdi.
«Óıtkeni meniń ornymda bolǵan árbir adam osylaı isteıdi, jalpy kásipke degen adaldyq bolý qajet»,- deıdi ol.
Eske sala ketsek, Arys qalasyndaǵy áskerı bólimniń qoımasynda 24 maýsym kúni tańerteń jarylys boldy. Saldarynan úsh adam qaza tapty - Arys turǵyny men eki áskerı qyzmetshi. 170-ke jýyq adam zardap shekti. 20-ǵa jýyq úı, 9 qora-qopsy janyp, dalaly aýmaqta 14 oshaq tutandy. Úı-jaılar men ǵımarattardyń 80-90 paıyzyna ártúrli deńgeıde zaqym keldi. Birqatar óńirde shuǵyl jeliler quryldy.
Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi. Sondaı-aq Elbasy Nursultan Nazarbaev Arystaǵy jaǵdaıǵa alańdaýshylyq bildirdi. Tuńǵysh Prezıdenttiń tóraǵalyǵymen Qaýipsizdik keńesiniń otyrysy ótip, onda Arys qalasyndaǵy ahýal talqylandy.
Úkimet otyrysynda Premer-Mınıstr Asqar Mamın jarylys saldarynan kóz jumǵandardyń týǵan-týystaryna kóńil aıtyp, turǵyndarǵa barlyq kómek kórsetiletinin aıtty. Keltirilgen zalaldyń kólemi baǵalanyp, Úkimet rezervinen aqsha bólinedi.
