Jarylqap Beısenbaıulynyń 5 tomdyq shyǵarmalar jınaǵy jaryq kórdi
Alǵashqy tomda ótken ǵasyrdyń jetpisinshi-sekseninshi jyldary oqyrman qaýym jyly qabyldaǵan, álemdik beıneleý óneri tarıhyndaǵy Jańasha dáýirdiń uly sheberleri men qazaqtyń sańlaq sýretkerleri jaıyndaǵy esseler shoǵyry jınaqtalǵan «Býyrqanǵan boıaýlar», sondaı-aq ultymyzdyń ozyq ádep dástúrleri men halyqaralyq etıket erejeleri sabaqtastyryla qarastyrylǵan «Ádep álemi» kitaptary qaıta óńdelip, tolyqtyrylyp berilgen. Avtordyń tarıh kóshi, baba jurttar izimen shetelderge barǵan jolsapar jazbalary da osy tomda qamtylǵan.
Ekinshi tomdy kóp jyldar boıy Shoqan Ýálıhanovtyń ómirin zerdelep, uly ǵalymnyń 1856 jyly jasaǵan Ystyqkól saparynyń izin qaıtalaı júrip ótken, ol eńbek etip, ǵumyr keshken mekenderde arnaıy bolǵan qarymdy jazýshynyń jańa ǵylymı, muraǵattyq qujattarmen baıytylǵan, kólemi 743 bettik «Shoqan» tarıhı-ǵumyrnamalaq roman-esse kitaby quraıdy. Úshinshi tomǵa avtordyń «Qazaq shejiresi»», «Arǵy túrkter aqıqaty izimen» atty eńbekteri, «Shoqan Ýálıhanov – aýyz ádebıeti men ortaǵasyrlyq jazba muralar zertteýshisi» jáne Joshy ulysynyń áıgili bekterbegi, qazaqtyń etnotektik tarıhynda eleýli orny bar Naǵanaı ulybı týraly «Naǵanaı bı» ǵylymı zertteýleri engen.
Qalamger ǵalymnyń Halyqaralyq Túrki akademııasynyń jobasy boıynsha «Qazirgi túrkologııa» serııasymen 2015 jyly elordadaǵy «Ǵylym» baspasynan jaryq kórgen «Ortalyq Azııadaǵy arǵytúrk sıpatty mádenıetter: etnotektik aspektiler» atty aýqymdy monografııasynyń óńdelip, tolyqtyrylǵan sońǵy nusqasy shyǵarmalardyń tórtinshi tomyn quraıdy. Besinshi tomǵa ultymyzdyń uly tulǵalary men baspasóz salasynyń kórnekti ókilderine qatysty esseleri, ózi qyzmet etken aqparat quraldary týraly maqalalary, bergen suhbattary, kitaptary men zertteýlerine qatysty retsenzııalar, avtor týraly lebizder, aýdarylǵan dúnıeleri toptastyrylǵan.
Qarymdy qalamger, zertteýshi-jýrnalıst Jarylqap Beısenbaıuly birqatar qazaq basylymynda abyroıly qyzmet atqarǵan tulǵa. Ol 1969-1990 jyldary «Lenınshil jas» (qazirgi «Jas Alash») gazetinde ádebı qyzmetker, bólim meńgerýshisi, jaýapty hatshy bolyp istedi. 1990—1997 jyldary «Ana tili» gazetiniń tuńǵysh Bas redaktory boldy. 1997 jyldyń sońynan Qazaq aqparat agenttigi dırektorynyń orynbasary, 2002 jyldan osy agenttik negizinde qurylǵan «QazAqparat» Ulttyq kompanııasy AQ-y Qazaq redaktsııasynyń bas redaktory. 2014-2017 jyldary «Mádenı mura» - «Kýltýrnoe nasledıe» jurnalynyń bas redaktory. Jaryqqa shyǵyp otyrǵan bes tomdyq - ardager jýrnalıstiń zeınet jasynda da shyǵarmashylyqtan qol úzbegeniniń bir aıǵaǵy.
