Jarylǵysh zatty, adamdy tabý: SQO-da «polıtseı» ıtter synaqtan ótti
SQO Polıtsııa departamenti baspasóz qyzmetiniń málimetinshe, Kınologııalyq qyzmet ortalyǵynyń bazasynda qyzmettik-izdestirý ıtteri testileýden ótti. Polıtseılerdiń kómekshileri adamdardy iz alyp izdeý, esirtki zattaryn jáne jarylǵysh zattardy anyqtaý, sondaı-aq zerthana jaǵdaıynda odorologııalyq sáıkestendirý jasaý arqyly tekserildi. Bul – olardyń jumysyndaǵy negizgi baǵyttar.
SQO PD KQO bastyǵy Samat Tólebaevtyń sózinshe, polıtsııanyń 52 qyzmettik ıti bar. Onyń 25-i – aýdandyq polıtsııa bólimderinde, 6-y – Petropavl qalalyq polıtsııa basqarmasynda, 21-i – oblystyq polıtsııanyń kınologııalyq ortalyǵynda. 12 ıt aýdandyq bólimderdi kúzetse, qalǵandary iz alatyndar.
Test qabyldaý barysynda 23 qyzmettik-izdestirý ıti synaqtan ótti. Esirtki qylmysyna qarsy kúres, ekstremızmge qarsy kúres, krımınaldyq polıtsııa jáne jedel-krımınalıstıkalyq basqarmalary sııaqty polıtsııanyń jetekshi bólinisteriniń basshylarynan turatyn komıssııa kınolog-polıtseılerdiń mashyqtaryn baǵalady. Óıtkeni bul bólinister Kınologııalyq qyzmettik ortalyqpen tyǵyz baılanysty.
Samat Tólebaevtyń aıtýynsha, qyzmettik ıtter ortalyq aýmaǵynda da, dala jaǵdaıynda da synaldy. Esirtkini jáne jarylǵysh zattardy almastyratyn, ıisi uqsas zattardy ıtter ormandy, dalaly jerlerden, avtokólikterden izdedi. Jarylǵysh zattardy izdestirýde tájirıbeli ınspektor-kınolog Evgenıı Sıchkovtyń Aıza atty nemis ovcharkasy úzdik nátıje kórsetti.
Esirtkini tabýda Robbı atty belgııa ovcharkasy erekshelendi, onyń úıretýshisi polıtseı-kınologi Vıktor Fýks.
Adamdy ormandy jerlerden izdestirýde Kókjal atty belgııa ovcharkasyna teń keler ıt bolmady. Onyń úıretýshisi polıtseı-kınolog Rashıd Sultanov.
PD jedel-krımınalıstıkalyq basqarmanyń odorologııalyq zertteý zerthanasyndaǵy synaqta úsh jasar Dezı atty ıt úzdik boldy. Spanıeldi jattyqtyrǵan polıtsııa serjanty – Nıkolaı Jeleznov.
Aıta ketetini, testileý barysynda jaqsy nátıje kórsetken ıtterdiń barlyǵy – buryn kınologtarmen birge QR ІІM Kınologııalyq ortalyǵy bazasynda birneshe aılyq jattyǵýlardyń kúrdeli kýrstarynan ótken.
Jalpy jeti aıda SQO-da qyzmettik-izdestirý ıtteri polıtseılermen birge 374 qylmystyń betin ashty, basym bóligi – urlyq. Esirtkimen baılanysty 10 qylmys ashyldy.
