Jarylǵysh zat týraly aqparatqa baılanysty astanadaǵy saýda ortalyǵynan adamdar evakýatsııalandy
NUR-SULTAN. QazAqparat – Elordada saýda jáne oıyn-saýyq ortalyǵynda jarylǵysh zat bar dep jalǵan habar bergen er adamǵa izdeý salyndy, dep habarlaıdy QazAqparat tilshisi Nur-Sultan qalalyq polıtsııa departamentiniń baspasóz qyzmetine silteme jasap.
«29 naýryzda saǵat 13:39-da «102» arnasyna «Saryarqa» saýda jáne oıyn-saýyq ortalyǵynyń jumys nómirinde belgisiz er adam qońyraý shalyp, 8 mınýttan keıin jarylys bolatynyn habarlaǵan. Oqıǵa ornyna shuǵyl qyzmet shyqty. Tekserý barysynda jarylǵysh qurylǵy jáne basqa da kúdikti zattar tabylǵan joq», - delingen habarlamada.
Polıtsııa departamenti taratqan málimetke sáıkes, ǵımarattan 350 adam evakýatsııalandy.
«Atalǵan faktige sáıkes QR QK 273-baby boıynsha sotqa deıingi tergeý amaldary júrgizilýde. Osy baptyń sanktsııasy 5 jylǵa deıingi merzimge bas bostandyǵynan aıyrýmen qylmystyq jaýaptylyqty kózdeıdi», - deıdi vedomstvodan.
Sondaı-aq, resmı habarlamada jarylǵysh zat týraly habarlaǵan adamdy anyqtaý sharasy júrip jatqany aıtylǵan.
Osy oraıda Nur-Sultan qalasynyń Polıtsııa departamenti jarylǵysh zat týraly jalǵan habar úshin qylmystyq jaýapkershilik qarastyrylǵanyn eskertedi.
