Jarylǵysh zat qoıyldy degen aqparatqa baılanysty Almaty qalasynda turǵyn úıden 50 adam qaýipsiz jerge kóshirildi
ASTANA. Qyrkúıektiń 22-si. QazAqparat - Jarylǵysh zat qoıyldy degen aqparatqa baılanysty Almaty qalasyndaǵy kópqabatty turǵyn úılerdiń birinen 50 adam qaýipsiz jerge kóshirildi.
QR Tótenshe jaǵdaılar mınıstrliginen málim etkendeı, qyrkúıektiń 21-i kúni saǵat 16.30-da Tótenshe jaǵdaılar departamentiniń kezekshi bólimine Túrksib aýdany, Seıfýllın, 67 meken-jaıynda ornalasqan úsh qabatty turǵyn úıdiń aýlasyna jarylǵysh zat qoıyldy degen anonımdi habar túsken.
Aqparat alynysymen, turǵyn úıden dereý 50 adam qaýipsiz jerge kóshirildi.
Tótenshe jaǵdaıǵa shuǵyl áreket etý qyzmetiniń 39 adamy men 12 tehnıkasy jumyldyryldy, onyń ishinde 16 adam men 5 tehnıka Almaty qalasy boıynsha TJD-nyń jeke quramy.
Arnaıy sharalardan keıin jarylǵysh zat tabylmady. Qurban bolǵandar men zardap shekkender joq.
