Jaryqsyz sol jaǵalaý: Tekserý jumystary jalǵasýda

NUR-SULTAN. QazAqparat – Elordada Esildiń sol jaǵalaýynyń basym bóligin elektr qýatynsyz qaldyrǵan apatqa baılanysty tekserý jumystary áli aıaqtalmaǵan, dep habarlaıdy QazAqparat tilshisi.

«Levoberejnaıa» shaǵyn stantsııasynyń tapsyrys berýshisi – «Astana qalasynyń damý baǵdarlamalaryn ákimshilendirý jónindegi departamenti» memlekettik mekemesi. Órt «Astana LRT» qurylysyna arnalyp shyǵarylǵan kabel arnasynda bastalǵan. Onyń tapsyrys berýshisi – «Astana LRT» JShS, merdigeri «China Railway Asia – Europe Construction Investment Co., LTD» JShQ bolsa, jumystardy oryndaǵan qosalqy merdiger uıymdar – «SK Kýlager» JShS men «Elbı Grýpp» JShS», - deıdi tilshiniń suraýhatyna jaýap bergen Nur-Sultan qalasynyń Otyn-energetıkalyq kesheni jáne kommýnaldyq sharýashylyq basqarmasynyń basshysy Ernat Bázil.

Onyń aıtýynsha, nysandardy elektr qýatynyń óshýi sebepteri men laýazymdy tulǵalar kinásiniń deńgeıi týraly túbegeıli sheshim arnaıy qurylǵan komıssııa jumysynyń qorytyndysy negizinde jasalady.

«Oqys jaǵdaı bolǵan kezde apattyń saldaryn joıǵan jumys brıgadasyna syıaqy berildi. Tekserý jumystarynyń qorytyndysy boıynsha aldaǵy ýaqytta mundaı jaǵdaıdyń aldyn alý úshin sharalar qoldanylady», - deıdi ol.

Eske sala ketsek, 10 qarashada el astanasynda Esil ózenniń sol jaǵalaýyndaǵy keıbir ǵımarattar jaryqsyz qalǵan bolatyn. Osy apattyq jaǵdaıǵa baılanysty Prezıdent Qasym-Jomart Toqaev arnaıy komıssııa qurýdy tapsyrdy.

Keıin Nur-Sultandaǵy apatty jaǵdaıǵa baılanysty qurylǵan komıssııanyń alǵashqy otyrysy ótkizildi.