Jaryq dıodty kóshe shamdary densaýlyqqa zııandy - ǵalymdar
ASTANA. QazAqparat - Amerıkanyń medıtsına qaýymdastyǵy (AMQ) jaryq dıodty kóshe shamdary densaýlyqqa keri áser etedi degen tujyrym jasady. Bul týraly nplus1.ru jazady.
AMQ mamandary sońǵy 10 jylda shyqqan jaryqtyń aǵzaǵa áseri taqyrybyndaǵy eńbekterdiń barlyǵyn saraptap shyqqan. Olar qoldanysta kóp kezdesetin kók jáne jasyl spektrli jaryq shyǵaratyn jaryq dıodty shamdardyń qýatty jaryq lastaýshy ekendigin anyqtaǵan.
Atap aıtar bolsaq, korreldik tústiń temperatýrasy 4000K qalypty kóshe shamynda kók tústiń kólemi 29 paıyz ári ol ótkir aq tús retinde qabyldanady. Onyń qanyqtylyǵy kózge jaısyz, ony sharshatady, shaǵylystyrý effektisi saldarynan zattardy qabyldaýdy tómendetedi, sondaı-aq kóz torshasyna zaqym keltiredi.
Tutastaı alǵanda ondaı sham densaýlyqqa keri áser etedi, ári túngi janýarlardy baǵytynan jańylystyryp olarǵa da zalal keltiredi. AMQ ókilderi tózimdiligi men ekonomıkalyq tıimdiligine oraı jaryq dıodty shamdar keńinen qoldanylýda ekendigin alǵa tarta otyryp, ol jańa standartqa aınalatyndyǵyn atap ótken. Sondyqtan olar korreldik tústiń temperatýrasy 3000K-dan aspaıtyn shamdardy qoldanýdy usynady. Olardyń jaryǵy da aq tústi, alaıda kók sáýle spektri az ári 4000K shamnan tıimdiligi 3 paıyzǵa kem.
