Jarty jylda qurylys jumystarynyń kólemi 3,8 paıyzǵa artty

ASTANA. QazAqparat - Aǵymdaǵy jyldyń alty aıynda Qazaqstandaǵy qurylys jumystary men qyzmetteriniń kólemi 1263,6 mlrd teńgeni qurady, bul 2017 jyldyń dál osy kezeńimen salystyrǵanda 3,8 paıyzǵa kóp, dep habarlaıdy QazAqparat QR Ulttyq ekonomıka mınıstrligi statıstıka komıtetine silteme jasap. 

Esepti kezeńde ásirese avtomagıstral, kóshe, jol, temir jol, kópir men jerasty jolyn salý jumystary kóp atqarylǵan, onyń jalpy kólemi 317,8 mlrd teńgeni qurady. Sonymen qatar, ınjenerlik qurylystar - 203,1 mlrd, ónerkásiptik ǵımarattar - 142,3 mlrd, turǵyn úı - 138,8 mlrd, taý-ken jáne qaıta óńdeýshi ónerkásip ǵımarattarynyń kólemi - 105,7 mlrd teńge boldy.

Qurylys-montaj jumystarynyń kólemi ótken jyldyń qańtar-maýsymymen salystyrǵanda 1,8 paıyzǵa azaıǵan. Onyń kólemi - 1063,9 mlrd teńge. Degenmen, kúrdeli jáne aǵymdaǵy jóndeý boıynsha jumystar kólemi tıisinshe 41 jáne 60,3 paıyzǵa ulǵaıǵan.

Bıylǵy qańtar-maýsym aılarynda 21 056 ǵımarattyń qurylysy aıaqtaldy. Onyń ishinde 19 760 ǵımarat - turǵyn úı. Jyl basynan beri 17 mektep, 41 mektepke deıingi mekeme, 1 aýrýhana jáne 2 ambýlatorııalyq emhana paıdalanýǵa berilgen.