Jarty jylda Qazaqstan shekarasynda 1,2 myńǵa jýyq zań buzý deregi anyqtaldy
«Eseptik kezeńde shekarashylar Memlekettik shekarada 1 183 quqyq buzý deregin anyqtap, zańsyz is-qımyldardyń jolyn kesti. Atap aıtqanda, Qylmystyq kodekstiń 392-babyna sáıkes, Qazaqstan Respýblıkasynyń Memlekettik shekarasyn qasaqana zańsyz kesip ótkeni úshin 68 adam jaýapkershilikke tartyldy. Sonymen qatar Ákimshilik quqyq buzýshylyq kodeksiniń 510-babyna sáıkes, shekara rejımin jáne jekelegen jerlerde bolý tártibin buzǵan 703 adam jazalandy», - dedi S.Ahmetqalıev Ortalyq kommýnıkatsııalar qyzmetinde Ulttyq qaýipsizdik komıteti Shekara qyzmetiniń bıylǵy birinshi jartyjyldyqtaǵy qyzmetiniń qorytyndysyna arnalǵan brıfıngide.
Onyń aıtýynsha, Qazaqstan Respýblıkasy aýmaqtyq sýlarynyń jáne ishki sýlarynyń rejımderin buzǵany úshin 68 adam ustaldy. Munymen qosa, atalǵan Kodekstiń 514-babyna sáıkes, Qazaqstan Respýblıkasynyń Memlekettik shekara rejımin buzǵany úshin 344 adam jaýapkershilikke tartyldy.
«Kaspıı teńizinde balyq resýrstaryn zańsyz aýlaýǵa qarsy is-qımyl nátıjesinde 240 shaqyrymnan astam brakonerlik balyq aýlaý quraldary tárkilendi. Bul kórsetkish ótken jylmen salystyrǵanda eki ese ósti. Osy oraıda tabıǵı mekendeý ortasyna 592 bekire tuqymdas balyq jáne 5 256 usaq balyq jiberildi. 1,5 mlrd teńgeden astam somaǵa ekonomıkalyq zalal keltirýge jol berilmedi», - dedi Shekara kúzeti departamenti bastyǵynyń birinshi orynbasary.
S.Ahmetqalıevtiń sózine qaraǵanda, qazir Memlekettik shekarany qorǵaýǵa 1200-den astam erikti jumyldyrylǵan. Olardyń kómegimen jyl basynda 60 quqyq buzý áreketi toqtatyldy.
Budan buryn habarlanǵandaı, Qazaqstanǵa zańsyz kirýge áreket jasaǵan sheteldikterdiń sany kóbeıgen.
