Jarty jylda el ekonomıkasyna 14,5 mlrd dollar ınvestıtsııa tartyldy
«Ótken jyly ınvestıtsııa tartýda pandemııaǵa deıingi deńgeıge shyǵa aldyq. Soma 23,7 mıllıard AQSh dollaryn qurady. Qolymyzdaǵy málimetke sáıkes, osy jyldyń birinshi jartyjyldyǵynda tartylǵan tikeleı ınvestıtsııa kólemi – 14,5 mlrd AQSh dollar. Ótken jylmen salystyrǵanda 28 paıyz ósim bar. Bul geosaıası jaǵdaıǵa, qańtar oqıǵasyna qaramastan, ınvestorlar respýblıkamyzǵa qatysty oń úrdisti saqtap otyrǵanyn kórsetedi. Investıtsııa aǵyny 28 paıyzǵa ósti jáne jyl qorytyndysynda josparlaǵan 24 mlrd AQSh dollaryn tarta alamyz dep úmittenemiz», - dedi mınıstr orynbasary ortalyq kommýnıkatsııalar qyzmetindegi baspasóz máslıhatynda.
Almas Aıdarov Memleket basshysy taıaýdaǵy 7 jyldyń ishinde Qazaqstan ekonomıkasyna syrttan keminde 150 mlrd AQSh dollaryn tartý mindetin qoıǵanyn atap ótti.
«Ol úshin belgili bir jumys istelýi kerek. Biz úshin eń bastysy – jalpy ınvestıtsııa kóleminiń ósýi emes, onyń sapaly ózgerýi. 2005-2010 jyldardy alsaq, tikeleı sheteldik ınvestıtsııanyń qurylymynda búkil aqshanyń 70 paıyzy munaı-gaz salasyna tıesili. Al sońǵy úsh jyldy alsaq, trendtiń ózgergenin kórip otyrmyz jáne munaı-gaz salasyndaǵy ınvestıtsııa úlesi - nebári 45 paıyz. Biz úshin basym mánge ıe salalar - saýda, aqparat, baılanys, óńdeý sektorynda ınvestıtsııa ósip keledi», - dedi ol.
