Jarty jylda atyraýlyqtar 123 mlrd teńgege nesıe alǵan
ATYRAÝ. QazAqparat - Jarty jylda atyraýlyqtar 123 mlrd teńgege nesıe alǵan, dep habarlady «QazAqparat» HAA tilshisi.
Jarty jylda Atyraý oblysynyń turǵyndary 123,4 mlrd teńge nesıe aldy, bul respýblıka boıynsha barlyq qaryzdyń 2,6 paıyzy. Bul ótken jylǵy qańtar-maýsymdaǵy kezeńnen 49,2 paıyzǵa nemese 40,7 mlrd teńgege kóp. Negizinen ósim jeke tulǵalarǵa tutynýshylyq nesıe berý esebinen boldy. Ol 90 protsentke artyp, 63,3 mlrd teńge berildi», - dep habarlady óńirlik kommýnıkatsııalar qyzmetinde ótken brıfıngte Ulttyq bank fılıalynyń dırektory Aınur Kósherbaeva.
Kósherbaeva túsindirgendeı, atyraýlyqtar 2017 jyly da ózderiniń qaryz alý daǵdysyn ózgertpegen. Kredıtter kóbinese qymbat smartfondar, jıhaz, qurylys materıaldary, kólik, toı, qudalyq ótkizý, brend kıimder satyp alý, ásirese kúzen tony, demalys, shetelde emdelý úshin resimdelgen.
«Kredıttik portfel nemese oblystyń ekinshi deńgeıli bankteriniń fılıaldary aldynda nesıe qaryzy 323,6 mlrd teńgeni qurady. Onyń 176,6 mlrd teńgesi (54,6 paıyzy) - jeke tulǵalarǵa berilgen qaryzdar, 147 mlrd teńgesi (45 paıyzy) zańdy tulǵalar alǵan nesıe. Merzimi ótken bereshek kólemi 20,7 mlrd teńgeni quraıdy», - dep habarlady Kósherbaeva.
