Jarty jylda Astananyń 2 myńǵa jýyq medıtsına qyzmetkeri elimizde jáne shetelde biliktilikterin arttyrdy
ASTANA. 10 shilde. QazAqparat - Birinshi jartyjyldyqta Astana qalasynyń medıtsınalyq uıymdarynyń 1928 qyzmetkeri elimizdiń jáne shet elderdiń ǵylymı ortalyqtarynda biliktilikterin arttyryp, alǵashqy synaqtan ótti.
Bul týraly astana.kz saıtyna Astana qalalyq densaýlyq saqtaý basqarmasynan málim etti.
Kýrstar elimizde «Salamatty Qazaqstan» memlekettik baǵdarlamasyn júzege asyrý aıasynda ótkizildi.
Medıtsına qyzmetkerleri alty aı boıy Reseı, Fınlıandııa, Ońtústik Koreıa, Belarýs, Túrkııa, Italııa, Ulybrıtanııa, Japonııa, Frantsııa, Ýkraına, Izraıl, Avstrııa jáne Shveıtsarııanyń jalpy tájirıbesin úırendi.
Jekelegen mamandyqtarmen qamtamasyz etýdi sheshý maqsatynda alǵashqy mamandyqtar kýrsynda onkologııa, kardıologııa, bakterıologııa jáne patologııa anatomııasy boıynsha 79 dáriger daıyndaldy.
Sonymen qatar, medıtsına uıymdarynyń qyzmetkerleri 4 sheberlik dárisine, 5 semınarǵa, Qazaqstan, Reseı, Germanııa, Úndistan, Fınlıandııanyń jetekshi mamandary ótkizgen 1 kóshpeli tsıklǵa qatysty.
«Alǵashqy kómek pen otbasylyq medıtsına boıynsha sheteldik tájirıbeni oqyp-úırený úshin jáne dárigerler men medıtsına qyzmetkerleriniń jumystaryn damytyp, jetildirý, jalpy medbıkelik tájirıbe jınaý maqsatynda elordanyń emhanalarynan 16 qyzmetker Fınlıandııaǵa jiberildi»,- delingen vedomstvo habarlamasynda.
Sondaı-aq, negizinen balalar, jasóspirimder men jastar densaýlyǵyna, salaýatty ómir saltyn qalyptastyrýǵa jete kóńil bólindi. Aldaǵy ýaqytta jasóspirimder medıtsınasy, psıhologııasy men áleýmettik jumystary boıynsha jattyqtyrýshy-oqytýshy bolyp jumys isteıtin Jastar densaýlyǵy ortalyǵynyń 13 qyzmetkeri Sankt-Peterbor qalasyna oqýǵa jiberildi.
«Budan bólek, medıtsınalyq ádis-tásilderdi meńgerip, qoǵamdaǵy túrli toptar men múgedekterdiń áleýmettik-psıhologııalyq máselelerin sheshý úshin medıtsına qyzmetkereleri «Demeý» otbasylyq medıtsına oqý-tájirıbe ortalyǵy bazasynda semınardan ótti. Medıtsına qadrlarynyń biliktilik deńgeılerin kóterip, únemi daıyndyqtan ótkizý halyqty sapaly da qoljetimdi medıtsınalyq qyzmetpen qamtýdyń turaqty kepili bolyp tabylady, - dep atap kórsetedi basqarmadan.
