Jarty jylda Astanada 15 myńnan astam náreste ómirge keldi

ASTANA. QazAqparat – Bıyl 6 aıda elordada 15 myńnan astam náreste ómirge keldi. Bul týraly Astana qalasynyń kommýnıkatsııalar qyzmeti alańynda «Jańa týǵan náresteler men analardyń densaýlyǵyn saqtaý týraly» taqyrybynda ótken brıfıngide málim boldy, dep habarlaıdy QazAqparat tilshisi.

Tamyzdyń birinshi aptasynda tabıǵı jolmen emizýdiń bala densaýlyǵyna paıdasyn túsindirý úshin Dúnıejúzilik densaýlyq saqtaý uıymy, ıÝNISEF jáne kóptegen elderdiń densaýlyq saqtaý mınıstrlikteri, azamattyq qoǵam ókilderiniń qoldaýymen Dúnıejúzilik omyraý sútimen emizý aptalyǵy uıymdastyryldy.

«2023 jylǵy aptalyq ana sútiniń qanshalyqty paıdaly ekenin túsindirýge, jumys istep júrgen áıelderdiń problemasyna, emizýli balalary bar analardyń quqyǵyn qorǵaýǵa arnalady», - dedi Astana qalasynyń bas pedıatry Dana Abelgazına.

Onyń aıtýynsha, ana quqyǵyn qorǵap, júktilik demalysyn ýaqytyly berý, sondaı-aq jumysqa shyqqannan keıin de olarǵa qajet jaǵdaı jasalýy baǵytynda aqparat taratyldy. Bıylǵy jarty jylda Astanada 15 121 bala dúnıege kelgen.

Kóptegen elderde keıingi 10 jylda balaǵa beretin túrli qospalardan bas tartyp, tabıǵı ana sútine kóship jatqandar sany aıtarlyqtaı artyp keledi.

Óz kezeginde Astana qalasynyń №3 kópbeıindi qalalyq aýrýhanasynyń neonatolog dárigeri Ulserik Qalıbekova ana súti emizýli balanyń dene bitimi men oı-sanasynyń tolyqqandy damýyna yqpal etetinin aıtty.

«Balanyń da, anasynyń da densaýlyǵyna ońtaıly áseri bolady», - dedi dáriger.

Mamandardyń sózine qaraǵanda, farmatsevtıkalyq kompanııalardyń jasandy qospalarǵa qatysty túrli jarnamalary qoǵamǵa keri áserin tıgizip jatyr. Osynyń saldarynan jas otbasylar ana súti men tabıǵı emizýdiń mańyzyn túsinbeı jatady.

Budan buryn habarlanǵandaı, tabıǵı ana súti álemde 820 myń balanyń ómirin qutqarady.