Jarty jylda Almatyda 4 sýdıa qyzmetinen bosatyldy
ALMATY. QazAqparat - Almaty qalalyq sotynyń tóraǵasy Nurǵazy Ábdiqanov jýrnalıstermen eseptik kezdesýde sońǵy alty aıda Almaty qalasynyń tórt sýdıasynyń jumystan bosatylǵany týraly aıtty, dep habarlaıdy QazAqparat tilshisi.
Óreskel zań buzǵany úshin Almaly aýdandyq №2 sotynyń sýdıasy Nadejda Karalýppa, Túrksib aýdandyq sotynyń sýdıasy Bıbigúl Hasanova, Áýezov №2 aýdandyq sotynyń sýdıasy Andreı Shteınke, Medeý aýdandyq sotynyń sýdıasy Nurlan Begaıdar qyzmetinen bosatyldy.
«Medeý aýdandyq sotynyń sýdıasy Nurlan Begaıdar azamattyq isti qaraý kezinde zańbuzýshylyqqa jol berdi. Jeke tulǵanyń Ulttyq Bank aldyndaǵy kepildik mindettemeleri 25 mlrd teńge bolatyn. Sýdıa ony Ulttyq Bankke bergen kepildemesi uzaq ýaqytqa negizsiz jaramsyz dep tanydy»- deıdi Almaty qalalyq sotynyń tóraǵasy Nurǵazy Ábdiqanov.
Sondaı-aq, ol sýdıa Nadejda Karalýppovanyń jibergen qatelikterin aıtty.
«Zańdy mańyzy bar faktini anyqtaý týraly azamattyq isti qaraý kezinde Qashqynbaevtyń ótinishi boıynsha ol óreskel zańbuzýshylyq jasady», - dedi ol
Bıbigúl Hasanovaǵa qatysty bylaı dedi: «M.-ǵa qatysty azamattyq isti qaraý kezinde basqarýshy kompanııanyń JShS-ne múlikti paıdalanýǵa tyıym salý týraly sheshim qabyldaǵan kezde protsessýaldyq zańdy óreskel buzý faktisi anyqtaldy. Sýdıa qaraýdyń protsedýralyq merzimderin buzdy», - dep tolyqtyrdy Nurǵazy Ábdiqanov.
«Biz mundaı máselelerdi asa úlken jaýapkershilikpen qaraımyz. Dórekilik, zańbuzýshylyqtar nemese negizgi sot etıkasyna qaıshy keletin jaǵdaılar kezdesse, birden sheshýge tyrysamyz. Ol solaı bolýy kerek », - dedi Almaty qalalyq sotynyń tóraǵasy.
