Jarty jylda 54 adam poıyz astyna túsken
NUR-SULTAN. QazAqparat – Jyl basynan beri 54 qazaqstandyq temirjol boıynda jazym bolǵan, dep habarlaıdy QazAqparat tilshisi.
Kólik polıtsııasy departamenti baspasóz qyzmetiniń habarlaýynsha, temirjol boıyndaǵy jazataıym jaǵdaılardy azaıtý úshin kólik polıtseıleri aldyn alý sharalaryn úzdiksiz júrgizip keledi.
«Jarty jylda «Temirjol – qaýipti aımaq» degen taqyryppen 349 birlesken aldyn alý sharasyn, 442 jınalys, 606 kezdesý ótkizdik. Soǵan qaramastan, azamattardyń temirjol boıyndaǵy qaýipsizdik erejelerin buzýy tyıylar emes. Departamentke qarasty ákimshilik polıtsııa basqarmasynyń málimetteri boıynsha, aǵymdaǵy jyldyń 6 aıynda temirjoldy belgilenbegen jerden kesip ótkeni úshin 14 198 azamat ákimshilik jaýapqa tartyldy», - delingen departament dereginde.
Ótken jyly adamdardyń salǵyrttyǵynan poıyz tizginshileri 337 ret shuǵyl toqtaýǵa májbúr bolǵan. Temirjol boıynda maldy qaraýsyz jiberý de beleń alyp otyr. Sonyń saldarynan poıyzdar 520 ret shuǵyl toqtaǵan. Relske qasaqana bógde zat tósegen 4 oqıǵa tirkelipti.
«Jambyl oblysynyń Qııaqty - Hantaý aralyǵynda «Nur-Sultan - Almaty» baǵytyndaǵy jolaýshylar poıyzy jylqyǵa soǵylǵan bolatyn. Mal ıesine 5 aılyq eseptik kórsetkish kóleminde aıyppul salyndy. Jyl basynan beri 54 azamat poıyz astyna túsip, ómirden ozdy. Polıtsııa qyzmetkerleri temirjol boıynda qaýipsizdik erejelerin saqtap, arnaıy bólingen oryndardan ǵana ótý kerektigin, balalardy qaraýsyz qaldyrmaý qajettigin eskertedi»,-delingen baspasóz aqparatynda.
