Jarty jylda 1414 baılanys ortalyǵyna 2 mıllıondaı qońyraý shalynǵan
ASTANA. QazAqparat - 2017 jyldyń birinshi jartyjyldyǵynda 1414 baılanys ortalyǵyna memlekettik qyzmetter jónindegi saýaldaryn joldap 2 mıllıondaı adam habarlasty, dep habarlaıdy «QazAqparat» HAA tilshisi «Ulttyq aqparattyq tehnologııalar» AQ baspasóz qyzmetine silteme jasap.
Salystyrmaly túrde aıtsaq, byltyr baılanys ortalyǵyna jyl boıy shamamen 3,5 mln adam habarlasqan. Sonymen birge, qoldanýshylardyń qanaǵattanýshylyǵynyń ortasha baǵasy jaqsy kórsetkishtegi 4,72 balldy qurady.
Biryńǵaı 1414 baılanys ortalyǵy 680 túrli memlekettik qyzmet boıynsha keńes berýdi júzege asyrady. Sonymen qatar, operatorlar mindetti medıtsınalyq saqtandyrý máseleleri boıynsha da keńes beredi. Ortalyqta 127 operator jumys isteıdi, olardyń qatarynda jumys isteýine barlyq jaılylyq jasalǵan múmkindigi shekteýli jandar da bar. Jumys kúnderi baılanys ortalyǵynyń operatorlary orta eseppen 15 myń qońyraýǵa jaýap beredi.
Alǵashynda qarapaıym call-ortalyq bolyp qyzmet atqarǵan biryńǵaı baılanys ortalyǵy qazir azamattarmen ózara baılanysýdyń negizgi arnasyna aınaldy.
Qazirgi ýaqytta paıdalanýshylar 1414.kz saıty, elektrondy poshta jáne vırtýaldy onlaın-kómekshiler arqyly suraqtaryn joldaı alady.
