Jarty jyl karantın bosqa ketti: Argentınanyń koronavırýsqa shamasy kelmeı jatyr
BÝENOS-AIRES. QazAqparat – Bes aı boıy qatań karantınde otyrsa da, Argentınadaǵy koronavırýs jaǵdaıy nasharlaı tústi, dep habarlaıdy QazAqparat Bloomberg agenttigine silteme jasap.
Koronavırýsqa test tapsyrǵan el turǵyndarynyń shamamen 47% oń nátıje kórsetti.
Argentına Chılıdi basyp ozyp, ınfektsııa juqtyrǵandar sany boıynsha álemde 10-orynda tur. Elde koronavırýs ınfektsııasynyń 417 735 jaǵdaıy tirkelip, vırýstyń saldarynan 8 730 adam qaıtys boldy.
Tek sońǵy aptada rastalǵan jaǵdaılardyń sany ınfektsııa jaǵdaılarynyń sany boıynsha alǵashqy jıyrmalyqqa kiretin elderge qaraǵanda 9,9%-ǵa ósken. Mysaly, Úndistanda ósim 9%-ǵa jetken.
Bastapqyda vırýs Býenos-Aıres pen oǵan jaqyn aýdandarda tirkelgen edi. Alaıda jaqynda buryn juqtyrý jaǵdaılary tirkelmegen nemese óte az bolǵan shaǵyn, kedeı provıntsııalarǵa tarady.
Keıbir aýdandarda, mysaly, Bolıvııamen shekaralas jatqan Jýjýı provıntsııasynda koronavırýs pen ony juqtyrý jaǵdaılarynyń órshýine baılanysty densaýlyq saqtaý júıesi bar kúshin salyp jumys isteýde.
Jaqynda Argentına prezıdenti Alberto Fernandes karantındi 20 qyrkúıekke deıin uzartty, ıaǵnı karantın elde alty aıǵa sozylyp otyr. Bul óz kezeginde Argentına ekonomıkasyna teris áser etedi. Jumyssyzdyq deńgeıiniń ózi 10%-dan asty.
Aıta ketý kerek, álem halqynyń 8%-yn quraıtyn Latyn Amerıkasy men Karıb teńizi aımaǵyndaǵy elderde ólim men koronavırýs ınfektsııasynyń jalpy sanynyń 30%-y tirkelgen. Óńirde COVID-19 juqtyrýdyń 19 mıllıon jaǵdaıy tirkelip, vırýstan 276 myń adam qaıtys bolǵan.
Búgingi tańda Brazılııa koronavırýs ınfektsııasyn juqtyrý jáne ólim sany boıynsha kóshbasshy bolyp qala beredi – munda 4 mıllıonǵa jýyq juqtyrý jaǵdaıy tirkelip, 121 myńnan astam adam qaıtys bolǵan.
