Jarty jyl ishinde memlekettik qyzmettiń 77,8 paıyzy elektrondyq formatta usynyldy - Ádilet mınıstrligi
Bul týraly aǵymdaǵy jyldyń birinshi jartyjyldyǵynyń qorytyndysy boıynsha ótken QR ÁM Tirkeý qyzmeti jáne quqyqtyq kómek kórsetý komıtetiniń keńeıtilgen alqa májilisinde komıtet tóraǵasy Baqyt Ábishev habarlady.
«Halyq arasynda elektrondyq qyzmettiń tanymaldyǵy kúrt artyp otyr. Ótken jyldyń sáıkes kezeńimen salystyrǵanda berilgen e-qyzmettiń sany 2,5 esege ulǵaıdy. Qazirgi kezde qazaqstandyqtar memlekettik qyzmetti ınternet arqyly alýdyń artyqshylyǵyn baıqap otyr» - dep atap kórsetti B. Ábishev.
Mysaly, birinshi jartyjyldyqta tirkelgen 10850 zańdy tulǵanyń 7 myńnan astamy HQKO-ǵa habarlaspaı, egov.kz portaly arqyly osy rásimdeýden ótken. Atalmysh kezeńde portal arqyly ártúrli 4048179 elektrondyq anyqtama berildi, sondaı-aq 10749 jyljymaıtyn múlikke quqyqtardy tirkeý júrgizildi.
Atalǵan qyzmetti alýdyń onlaın-tásiliniń artyqshylyǵy - tirkeý merzimderin bir kúnge deıin qysqartady jáne qaǵaz qujattar bolmaıdy.
Baspasóz qyzmetiniń atap ótýinshe, alqa májilisi barysynda Ábishev zańdy tulǵalar men jyljymaıtyn múlikke quqyqtardy tirkeý boıynsha memlekettik qyzmetti kórsetý salasynda sońǵy kezeńde paıda bolǵan jańalyqtarǵa aıryqsha kóńil bóldi. Máselen, jeke kásipkerlik sýbektilerin tirkeý merzimi 1 jumys kúnine deıin qysqardy (buryn merzimi 3-7jumys kúni bolatyn). Zańdy tulǵany tirkeý týraly kýáliktiń telnusqasyn (dýblıkatyn) endi egov.kz arqyly alýǵa bolady, ony ádettegi prınterden basyp shyǵaryp, talap etken jerge jiberesiz. Sonymen qatar shaǵyn kásipkerlik sýbektilerin memlekettik tirkeýden bas tartý múmkindigi joıyldy, orta jáne iri kásipkerlik sýbektilerin elektrondyq tirkeý múmkindigi iske asyryldy. Komıtet tóraǵasynyń aıtýynsha, bular tóreshildik bıýrokratııalyq amaldardy qysqartyp, bıznes ýaqytyn únemdeýge, sondaı-aq sybaılas jemqorlyqqa qarsy kúreske baǵyttalǵan.
