Jarty tonnaǵa jýyq usaq aqsha jınap, kólik satyp aldy
ASTANA. QazAqparat - Qytaıdyń Shandýn ólkesi Bınjoý qalasynda turatyn Pan esimdi azamat usaq aqshalarmen kólik satyp aldy. Bul avtosalon qyzmetkerlerin ájeptáýir ábigerge saldy.
Ondaǵan jáshikke salynǵan maıda aqshalardyń salmaǵy 500 keli shamasynda bolǵan, dep habarlaıdy 24.kz.
Kólik satýshy menedjer jaqyn mańdaǵy banktiń kómegine júginbek bolǵanymen, mundaı mólsherdegi maıda aqshalardy mekeme qabyldamaı qoıady. Aqyry avtosalondaǵy 15 adam eki kún boıy usaq aqshalardy sanap shyqqan. Sý jańa kóliktiń ıesi atanǵan Pan usaq-túıek satýmen aınalysqan eken. Ol saýdadan túsken tabysynyń shashaýyn shyǵarmaı, 50 myń ıýanǵa (3 mln teńge) jetkizgen kórinedi.
