Jartylaı marafondaǵy qaıǵyly jaǵdaıdan soń mınıstrlik mundaı sharalarǵa talapty kúsheıtpek
ASTANA. KAZINFORM - Almaty qalasynda ótken jartylaı marafon kezinde eki qatysýshynyń qaza tabýy – aýyr ári erekshe nazar aýdarýdy qajet etetin jaǵdaı.
Bul týraly óziniń Instagram paraqshasynda Týrızm jáne sport mınıstri Erbol Myrzabosynov jazdy.
- Qazirgi ýaqytta oqıǵa boıynsha tolyqqandy tekseris júrgizilip jatyr. Qatysýshylardyń densaýlyq jaǵdaıy, jarysty uıymdastyrý tártibi, medıtsınalyq qamtamasyz etý deńgeıi men qaýipsizdik reglamenti jan-jaqty saraptalady,- dedi mınıstr.
Sondaı-aq ol sózinde jergilikti atqarýshy organdar ótkizetin mundaı sharalarǵa talapty kúsheıtiletinin atap ótti. Buqaralyq sport qaýipsiz ári kásibı deńgeıde uıymdastyrylýy tıis.
- Týrızm jáne sport mınıstrligi bul baǵytta naqty usynystar ázirlep, tıisti qurylymdarǵa joldaıdy.
Qaza bolǵan azamattardyń jaqyndaryna kóńil aıtamyn!,- dep jazdy, Erbol Myrzabosynov.
Osyǵan deıin Almatyda jartylaı marafonǵa qatysqan eki adam qaıtys bolǵany týraly jazdyq.
