Jarty jylda shaǵyn jáne orta bıznes sýbektileriniń sany shamamen 550 myńǵa artty
ASTANA. KAZINFORM – Qazaqstan Premer-mınıstri Oljas Bektenov Qarjy, Ulttyq ekonomıka mınıstrlikteri jáne «Atameken» ulttyq kásipkerler palatasy basshylyǵynyń qatysýymen kásipkerlikti damytý máseleleri jóninde keńes ótkizdi, dep habarlaıdy Úkimettiń baspasózqyzmeti.
Jıynda kásipkerlik salasyndaǵy qazirgi jaǵdaı, salyq reformasynyń aldyn ala nátıjeleri jáne bıznes sýbektileriniń qyzmetin ádil retteýdi qamtamasyz etý sharalary qaraldy. Sondaı-aq iskerlik belsendilikke, salalyq jáne óńirlik kórsetkishterge nazar aýdaryldy.
Qarjy mınıstri Mádı Takıevtiń baıandaýynsha, І jartyjyldyq qorytyndysy boıynsha respýblıkalyq bıýdjetke korporatıvtik tabys salyǵynan túsetin túsimder 15,7%-ǵa artqan. Salalar arasynda oń serpin ásirese qarjy sektorynda jáne óńdeý ónerkásibinde baıqalady.
Sondaı-aq birinshi jartyjyldyq qorytyndysy boıynsha shaǵyn jáne orta bıznes sýbektileriniń sany shamamen 550 myńǵa artty.
Qarjy mınıstrliginiń derekterine sáıkes, bul kórsetkish ózin-ózi jumyspen qamtyǵan azamattardyń qyzmetin zańdastyrý jumystarynyń nátıjesinde qalyptasty. Bul rette ózin-ózi jumyspen qamtyǵandar tek áleýmettik tólemderdi júzege asyra otyryp, salyq tóleýden bosatylady. Sonymen qatar jaldanbaly jumyskerleri joq 260 myńǵa jýyq shaǵyn jáne orta bıznes sýbektisi óz qyzmetin toqtatqan, bul bıznestiń jasandy túrde «bólshekteý» tájirıbesiniń aıtarlyqtaı qysqarǵanyn kórsetedi.
Sonymen qatar Salyq kodeksine engizilgen ózgeristerdi eskere otyryp, 2026 jylǵy 1 qańtardan bastap korporatıvtik tabys salyǵy boıynsha avanstyq tólemderdi tóleý shegi 325 myń AEK-ten (1,4 mlrd teńge) 600 myń AEK-ke (2,6 mlrd teńge) deıin kóterildi. Nátıjesinde jańa talaptarǵa sáıkes keletin kásiporyndar korporatıvtik tabys salyǵy boıynsha túpkilikti esep aıyrysýdy jylyna bir ret júrgizedi. Osyǵan baılanysty 2026 jyldyń qorytyndysy boıynsha túsetin tıisti túsimder 2027 jyldyń bıýdjetinde kórsetiledi (buǵan deıin olar esepti jyl ishinde aı saıyn túsip otyrǵan). Bul bızneske eseptilik kólemin qysqartýǵa jáne aınalym qarajatyn saqtap qalýǵa múmkindik beredi.
«Atameken» UKP tóraǵasy Qanat Sharlapaev bızneske qatysty birqatar máseleni kóterip, isker qoǵamdastyq atynan usynystar aıtty.
Sondaı-aq ulttyq ekonomıka birinshi vıtse-mınıstri Azamat Ámrın pikir bildirdi.
Talqylaý qorytyndysy boıynsha Oljas Bektenov ekonomıkanyń turaqty ósimin qamtamasyz etý jónindegi ortaq maqsatqa qol jetkizý úshin memleket pen bıznes arasyndaǵy ózara is-qımyldyń tıimdiligin arttyrý maqsatynda yntymaqtastyqty jalǵastyrýdy tapsyrdy. Qarjy jáne Ulttyq ekonomıka mınıstrlikterine «Atameken» UKP-men birlesip, kásipkerlik sektordyń jaı-kúıine salalyq jáne óńirlik bóliniste keshendi taldaýdy aı saıyn júrgizip, onyń nátıjeleri boıynsha tıisti aqparatty engizip otyrý tapsyryldy.
Osyǵan deıin eldegi áleýmettik kásipkerlik sýbektileriniń sany 1577-ge artqany týraly jazdyq.
