Jarty jylda Ózbekstan ekonomıkasy 7,2 paıyzǵa ósti

TAShKENT. KAZINFORM – Qańtar-maýsym aılary aralyǵynda Ózbekstannyń ishki jalpy ónimi 7,2 paıyzǵa ósti, bul ótken jyldyń sáıkes kezińimen salystyrǵanda 1,1 paıyzǵa kóp, dep habarlaıdy Kazinform agenttiginiń menshikti tilshisi.

Ózbekstannyń Ulttyq statıstıka komıtetinen málim etkendeı, qurylys salasynda 10,7% ósim baıqaldy. Sonymen qatar, aýyl, orman jáne balyq sharýashylyǵy, jolaýshylar tasymaly baǵyttaryndaǵy jobalar oń nátıje bere bastady.

Munymen birge, ınflıatsııa byltyrmen salystyrǵanda 5,2 paıyzdan 4,2 paıyzǵa deıin baıaýlap, halyq tabysynyń ósimi 11,9 paıyzdan 9,5 paıyzǵa deıin kemidi.

Qosa ketsek, buǵan deıin Ózbekstanda qazaqstandyq kapıtalmen jumys isteıtin kompanııalar qatary kóbeıgenin jazyp edik. Jarty jyldyń ishinde bizdiń el Ózbekstanda 116 kásiporyn ashty. Osylaısha, qazir resmı Tashkentte qazaqstandyq kapıtalmen jumys isteıtin kompanııalar sany 1 157-ge teńeldi.

Sondaı-aq Ózbekstannyń altyn-valıýta qory 1,1 mlrd dollarǵa qysqaryp, eldiń syrtqy qaryzy 68,4 mıllıard dollarǵa jetti.