Jarty jylda halyqaralyq aqsha aýdarymdary júıesi arqyly 383,8 mlrd teńge shetelge aýdarylǵan
ASTANA. KAZINFORM – 2024 jyldyń І jartyjyldyǵynda halyqaralyq aqsha aýdarymdary júıesi (budan ári – HAAJ) arqyly júrgizilgen aýdarymdardyń jıyntyq mólsheri 2023 jyldyń osy kezeńindegi kórsetkishpen salystyrǵanda 19%-ǵa tómendep, 515,3 mlrd teńge boldy. Bul týraly Ulttyq banktiń baspasóz qyzmeti habarlady.
HAAJ arqyly júrgizilgen aýdarymdardyń deni (94%) – jeke tulǵalar arasyndaǵy óteýsiz aýdarymdar. Bul osy júıelerdiń jeke aýdarymdar úshin yńǵaıly bolýynda, sebebi munda banktik shottardy ashý qajet emes.
– HAAJ arqyly júrgizilgen aýdarymdardyń negizgi bóligi (98%) Qazaqstan men basqa elder arasyndaǵy transshekaralyq aýdarymdardy bildiredi. Onyń 75%-y shetelge jiberildi. Ol 2024 jyldyń І jartyjyldyǵynda 383,8 mlrd teńgeni quraıdy. Bul aýdarymdardyń shamamen 87%-y «Zolotaıa Korona» júıesi arqyly júzege asyrylady. Qazaqstannan shetelge júrgizilgen bir aýdarymnyń ortasha somasy 330,1 myń teńge bolady. Negizgi alýshy elder: Reseı (31,2%), Ózbekstan (26,8%), Túrkııa (20,9%), Grýzııa (7,7%) jáne Qyrǵyzstan (3,6%), - delingen habarlamada.
Shetelden alynǵan aýdarymdar jalpy kólemniń 23%-yn qurady. Bul 120,4 mlrd teńgege teń. Bul aýdarymdardyń edáýir bóligi «Zolotaıa Korona» jáne «Vestern ıÝnıon» tólem júıelerine tıesili. Shetelden Qazaqstanǵa júrgizilgen bir aýdarymnyń ortasha somasy 279,3 myń teńge bolady. Negizgi jóneltýshi elder – Reseı (28,3%), AQSh (12,4%), Ońtústik Koreıa (11,2%), Ózbekstan (9,7%) jáne Túrkııa (7,4%).
