Jarty jylda AÓK-ke salynǵan ınvestıtsııa 926 mlrd teńge boldy
ASTANA. KAZINFORM – Kókónis qoımalaryn salý jalǵasady. Bul týraly Úkimet otyrysynda QR Aýyl sharýashylyǵy vıtse-mınıstri Azat Sultanov málim etti.
- Agroónerkásiptik keshenniń negizgi kapıtalyna salynǵan ınvestıtsııalar kólemi de turaqty oń dınamıka kórsetip, 1,6 trln teńgege jetti, bul ótken jyldyń deńgeıinen 46%-ǵa joǵary. 2026 jyldyń birinshi jartyjyldyǵynda AÓK-tiń negizgi kapıtalyna salynǵan ınvestıtsııalar kólemi 926 mlrd teńgeni qurap, byltyrǵy sáıkes kezeńimen salystyrǵanda 55%-ǵa artty, - dedi A.Sultanov.
Onyń aıtýynsha, kókónis qoımalaryn salý jónindegi keshendi jospar tabysty iske asyryldy, ıaǵnı jalpy saqtaý qýattylyǵy 745,6 myń tonnany quraıtyn 95 nysan paıdalanýǵa berildi. Bul ónim shyǵynyn azaıtýǵa, maýsymdyq baǵa aýytqýlaryn tómendetýge jáne maýsymaralyq kezeńde kókónisterdiń turaqty jetkizilýin qamtamasyz etýge múmkindik berdi.
- Dándi, maıly jáne burshaq daqyldaryn saqtaý ınfraqurylymyn damytý maqsatynda Agrarlyq nesıe korporatsııasy elevatorlar men astyq qoımalaryn salýdy kredıtteý baǵdarlamasyn iske qosty. Aýyl sharýashylyǵy ónimderin ótkizýdi kepildendirýdiń tıimdi tetikteriniń biri – forvardtyq satyp alý mehanızmi. Bul tetik Azyq-túlik kelisimshart korporatsııasy tarapynan bolashaq ónimge aldyn ala qarjy bólýdi kózdeıdi. Sonyń nátıjesinde aýyl sharýashylyǵy taýaryn óndirýshiler egis jumystaryn júrgizýge qajetti qarajatty aldyn ala alyp, óndirilgen ónimdi ótkizýdi qamtamasyz etedi. 2026 jylǵy ónimdi forvardtyq satyp alý aıasynda 173 aýyl sharýashylyǵy taýaryn óndirýshige shamamen 32 mlrd teńge kóleminde qarjy bólindi. Kelisimshart jasalǵan ónimniń jalpy kólemi shamamen 480 myń tonna boldy, - dedi vıtse-mınıstr.
Onyń sózine qaraǵanda, osy jyly kóktemgi egis jáne egin jınaý jumystaryn júrgizýge, sondaı-aq aýyl sharýashylyǵy tehnıkasynyń lızıngine arnalǵan jeńildetilgen qarjylandyrý kólemi - 1,1 trln teńge. Onyń ishinde 272 mlrd teńge respýblıkalyq bıýdjetten bólindi.
- Sonymen qatar salany sýbsıdııalaýǵa 588,3 mlrd teńge baǵyttaldy. Memlekettik qoldaý quraldary shıkizat óndirýden jáne saqtaýdan bastap, qaıta óńdeýge, daıyn ónimdi ótkizýge jáne eksporttaýǵa deıingi búkil óndiristik tizbekti qamtıdy. Agrarlyq nesıe korporatsııasy jáne basqa da qarjy ınstıtýttary arqyly jeńildetilgen qarjylandyrý tetigi ońaılatyldy: qaryz alýshylar nesıeni birden sońǵy jeńildetilgen mólsherlememen alady. Bul ákimshilik rásimderdi qysqartyp, kassalyq alshaqtyqtardy boldyrmaıdy jáne qarajattyń óndirýshiler men qaıta óńdeýshilerge ýaqtyly jetkizilýin qamtamasyz etedi. Osy sharalardyń nátıjesinde 2025 jyly agroónerkásiptik keshende 841 mlrd teńge somasyna 255 ınvestıtsııalyq joba iske qosyldy. Bıyl 1,3 trln teńge somasyna 161 ınvestıtsııalyq jobany iske asyrý josparlanyp otyr, - dedi A.Sultanov.
Buǵan deıin habarlanǵandaı, jarty jylda ishki taýar aınalymynyń kólemi 36,2 trln teńge boldy.
