Jarty jylda 7,9 mıllıon sharshy metr turǵyn úı paıdalanýǵa berildi – mınıstr
ASTANA. KAZINFORM – Jyl basynan beri elimizde 7,9 mıllıon sharshy metr turǵyn úı paıdalanýǵa berilip, kórsetkish 6,6 paıyzǵa artty. Bul týraly Ónerkásip jáne qurylys mınıstri Ersaıyn Naǵaspaev málim etti.
- Turǵyn úı salasyndaǵy bıylǵy jospar – 19, 2 mıllıon sharshy metr baspana salý bolyp belgilendi. Jarty jylda 7,9 mıllıon sharshy metr turǵyn úı paıdalanýǵa berilip, kórsetkish 6,6 paıyzǵa artty. Bul baǵytta elimizdiń 18 óńirinde oń dınamıka baıqalyp otyr. Turǵyn úı saıasaty oń ósim kórsetip otyrǵan óńirler qatarynda Túrkistan, Aqmola, Ulytaý, Jetisý oblysy men Shymkent qalasy bar. Abaı jáne Qaraǵandy oblysynda tómen kórsetkish baıqalady. Qurylys qarqynynyń tómendeýi jobalyq-smetalyq qujattamany túzetý men ıpotekalyq baǵdarlamalar kóleminiń qysqarýy sııaqty faktorlarmen baılanysty, - dedi Ersaıyn Naǵaspaev Úkimet otyrysynda.
Mınıstr keltirgen málimetke sáıkes, bıyl 6 aıda jalpy qurylys jumystarynyń kólemi 3,3 trıllıon teńgege jetip, 18,4 paıyz artty.
- Tek Atyraý oblysynda teris dınamıka tirkeldi. Oǵan sebep Teńiz ken ornyndaǵy «Bolashaq keńeıtý» iri jobasynyń aıaqtalýy. Degenmen oblystaǵy qurylys kólemi Astana, Almaty qalalary men Qaraǵandy oblysynan keıin tórtinshi orynda tur. Qalǵan 19 óńirde oń ósim qarqyny saqtalyp otyr. Jalpy qurylys salasy 2010 jyldan beri ortasha 7 paıyz ósimdi kórsetip keledi. Al sońǵy eki jylda qurylys kóleminiń ósimi 115 paıyzdan joǵary bolyp otyr. Bul ındýstrııa, turǵyn úı jáne ınfraqurylymdyq qurylystaǵy belsendiliktiń nátıjesi. Bıyl da osy qarqyndy saqtap qalýdy josparlap otyrmyz, - deıdi ol.
Buǵan deıin Oljas Bektenov Ónerkásip jáne qurylys mınıstri Ersaıyn Naǵaspaevty synǵa alǵan edi.