Jarty jylda 50 myńnan astam qazaqstandyq Ázerbaıjanǵa barǵan
ASTANA. KAZINFORM – 2026 jyldyń alǵashqy alty aıynda Ázerbaıjanǵa 50 myńnan astam Qazaqstan azamaty saparlady. Bul ótken jyldyń sáıkes kezeńimen salystyrǵanda 11 paıyzǵa kóp. Bul týraly Kazinform agenttiginiń menshikti tilshisi Ázerbaıjannyń Memlekettik týrızm agenttigine silteme jasap habarlady.
Týrıster sanynyń artýyna baılanysty Ázerbaıjannyń Týrızm bıýrosy 21-24 shilde aralyǵynda Qazaqstan men Ózbekstannyń týrıstik kompanııalary ókilderine arnalǵan tanystyrý týryn uıymdastyrdy.
Іs-sharanyń maqsaty – eldiń týrıstik áleýetin tanystyrý jáne týrızm salasyndaǵy yntymaqtastyqty keńeıtý.
Sapar barysynda 20-ǵa jýyq týrıstik kompanııa ókili Ázerbaıjannyń týrıstik ınfraqurylymymen tanysty.
Olar jaǵajaı týrızminiń múmkindikterin, tarıhı-mádenı mura nysandaryn, ulttyq taǵamdardy jáne týrısterge usynylatyn qyzmet túrlerin kórdi.
Baǵdarlamanyń basty oqıǵasy B2B formatyndaǵy kezdesý boldy.
Oǵan Qazaqstan men Ózbekstannyń týrızm salasy ókilderi, sondaı-aq Ázerbaıjannyń 80-ge jýyq týroperatory men qonaqúı bıznesiniń ókilderi qatysty.
Kezdesý barysynda jańa týrıstik baǵyttardy damytý, seriktestik baılanystardy keńeıtý jáne birlesken jobalardy iske asyrý máseleleri talqylandy.
Qazaqstanmen qatar, Ózbekstannan keletin týrıster sany da turaqty ósip keledi.
Bıylǵy alty aıda Ázerbaıjanǵa Ózbekstannyń 34 myńnan astam azamaty barǵan.
Bul ótken jyldyń osy kezeńimen salystyrǵanda 49 paıyzǵa kóp.
Uıymdastyrýshylardyń aıtýynsha, tanystyrý týry Ortalyq Azııa elderinen keletin týrıster sanyn arttyrýǵa jáne týrızm naryǵyna qatysýshylar arasyndaǵy iskerlik baılanysty nyǵaıtýǵa yqpal etedi.
Aıta keteıik, Qazaqstan Ázerbaıjan Gran-prıine bılet satyp alý boıynsha óńirde kósh bastady.
