Jarty mıllıonnan astam bala balabaqshalarǵa vaýcher aldy

ASTANA. KAZINFORM — Vaýcherlik qarjylandyrý tetigi elimizdiń 20 qalasy men 7 aýdanynda júzege asyrylyp jatyr, dep habarlaıdy Oqý-aǵartý mınıstrligi.

Memleket basshysynyń tapsyrmasy boıynsha 2024 jyldan bastap Qazaqstanda mektepke deıingi uıymdarda vaýcherlik qarjylandyrý júıesi kezeń-kezeńimen engizilýde.

Bul joba mektepke deıingi bilim berý salasynda qyzmetterdiń qoljetimdiligi men sapasyn arttyrýǵa, sondaı-aq ashyqtyqty qamtamasyz etýge baǵyttalǵan.

— Búgingi kúni vaýcherlik qarjylandyrý júıesine 4,7 myńǵa jýyq mektepke deıingi uıym qosyldy, 500 myńnan astam bala balabaqshadan oryn aldy. Respýblıkalyq mańyzy bar qalalarda kezek eki ese qysqardy, — dep habarlaıdy Mektepke deıingi bilim berý departamentiniń dırektory Manar Adamova.

Vaýcherlik qarjylandyrý júıesi bos oryndary bar jáne belgilengen talaptarǵa saı keletin mektepke deıingi uıymdarǵa qoljetimdilikti qamtamasyz etedi.

Ata-analarǵa balabaqshany óz qalaýynsha tańdaý múmkindigi berilgen, bul jeke jáne memlekettik balabaqshalar arasynda salaýatty básekelestikti qalyptastyrady.

Júıe eń aldymen «aqsha balaǵa beriledi» qaǵıdatyna negizdelgen qarjylandyrýdyń ashyqtyǵyn qamtamasyz etetin negizgi shartty qamtıdy. Qarajat tek balanyń barýyn ata-analar rastaǵannan keıin ǵana aýdarylady.

Barlyq mektepke deıingi uıymdardy vaýcherlik qarjylandyrýǵa kóshirý 2025 jyldyń sońyna deıin tolyq aıaqtalady dep josparlanyp otyr.

Osyǵan deıin tsıfrlyq qujattarmen balabaqshaǵa qabyldaý jeńildeı túskeni habarlandy.