Jarty mıllıonǵa jýyq oqýshy jaıly mektepterde bilim alatyn bolady
ASTANA.KAZINFORM — 2024–2025 oqý jylynyń basynan bastap joba aıasynda 254 myń oqýshy orny paıdalanýǵa berildi, dep habarlaıdy Oqý-aǵartý mınıstrligi.
Qazaqstanda balalardyń turǵylyqty jerine qaramastan, qazirgi zamanǵy talaptarǵa saı, sapaly jáne tegin bilimge teń qoljetimdilikti qamtamasyz etý maqsatynda «Jaıly mektep» ulttyq jobasy qarqyndy júzege asyrylyp jatyr.
— Memleket basshysynyń bastamasymen 2024–2025 oqý jylynyń basynan bastap joba aıasynda 254 myń oqýshy orny paıdalanýǵa berildi. 2025 jyldyń sońyna deıin bul kórsetkish 460 myńǵa jetip, jarty mıllıonǵa jýyq balanyń zamanaýı, qaýipsiz jáne jaıly jaǵdaıda bilim alýyna múmkindik beriledi, — delingen habarlamada.
Joba sheńberinde bilim berý ortasynyń fýnktsıonaldyǵy men qaýipsizdigine erekshe mán berilip jatyr. Mekteptegi keńistikter oqýshylardyń jas erekshelikterin eskere otyryp uıymdastyrylǵan: bastaýysh jáne joǵary synyptarǵa arnalǵan bólek bloktar qarastyrylǵan. Qaýipsizdik sharalary zamanaýı tehnıkalyq sheshimder arqyly kúsheıtilip, erekshe bilim berý qajettilikteri bar balalar úshin kedergisiz orta qurylyp jatyr.
«Jaıly mektep» úlgisi boıynsha salynǵan jańa mektepter tıptik mektepterden 15–20%-ǵa keń, bul qosymsha oqý kabınetteri men demalys aımaqtaryn ornalastyrýǵa múmkindik beredi. Mundaı mektepter zamanaýı pándik kabınettermen — fızıka, hımııa, bıologııa zerthanalarymen, kompıýterlik synyptarmen, STEM-zerthanalarmen jáne robototehnıka kabınetterimen jabdyqtalǵan. Ár oqýshyǵa jeke shkaf pen jyljymaly parta beriledi. Sanıtarlyq talaptarǵa sáıkes, mekteptiń ár qabatynda aýyzsý fontandary ornatylǵan. Sonymen qatar balalardyń shyǵarmashylyq áleýetin damytý jáne kásibı daǵdylardy qalyptastyrý úshin ámbebap sheberhanalar, stýdııalar men kásiptik oqytý kabınetteri qarastyrylǵan.
Mektep ınfraqurylymynda eki kireberisi bar ashanalar, ıaǵnı bastaýysh jáne joǵary synyptar úshin bólek tamaqtaný aımaqtary uıymdastyrylǵan. Sondaı-aq mektepterde medıtsınalyq kabınetter dáriger nemese medbıke bólmesi, ızolıator jáne protsedýralyq bólme jasaqtalǵan.
Buǵan deıin Joǵary aýdıtorlyq palata múshesi Nurlan Nurjanov «Jaıly mektep» ulttyq jobasy aıasynda salynǵan 205 mekteptiń jalpy quny jospardaǵy qunynan 250 mlrd teńgege asyp túskenin aıtty.