Jarty ǵasyrdan beri jumys istep turǵan jylý jelileri aýystyryldy

ASTANA. KAZINFORM – Elimizdiń birneshe qalasynda eski jylý magıstraldary jańartyldy. Bul týraly Úkimet otyrysynda Energetıka mınıstri Erlan Aqkenjenov aıtty.

35 let bez kapremonta: teploset s ıznosom 85% rekonstrýırýıýt v Taraze
Foto: sgenerırovano II

- Jazǵy kezeńde «Energetıkalyq jáne kommýnaldyq sektorlardy jańǵyrtý» ulttyq jobasyn iske asyrý aıasynda barlyq óńirde jylý jelilerin rekonstrýktsııalaý boıynsha aýqymdy jumystar júrgizildi. Atap aıtqanda, Stepnogorsk qalasynda 53 jyl boıy qoldanysta bolǵan uzyndyǵy 9,5 shaqyrym jylý jelisi rekonstrýktsııalandy. Sondaı-aq Taldyqorǵan qalasynda birinshi kezeń aıasynda 46 jyl boıy qoldanysta bolǵan uzyndyǵy 3,5 shaqyrym qalanyń negizgi jylý magıstrali jańartyldy, - dedi ol.

Mınıstr dereginshe, Petropavl qalasynda 1980 jyldan beri qoldanysta bolǵan jalpy uzyndyǵy 4,3 shaqyrym jylý magıstraldarynyń eki ýchaskesi rekonstrýktsııalandy. Sonymen qatar Qaraǵandy qalasynda tozý deńgeıi 81% quraıtyn, dıametri 1020 mm jylý magıstralin rekonstrýktsııalaý jumystary aıaqtaldy.

- Atalǵan jobalardyń barlyǵynda otandyq óndiristen shyqqan zamanaýı energııa tıimdiligi joǵary aldyn-ala oqshaýlanǵan qubyrlar qoldanyldy. Bul halyqty jylýmen jabdyqtaý senimdiligin arttyrýǵa jáne salynyp jatqan nysandardy qosý úshin qajetti rezervti qamtamasyz etýge múmkindik berdi, - dedi Erlan Aqkenjenov.

Onyń atap ótýinshe, osyndaı jumystar óńirlik elektr jelilerin rekonstrýktsııalaý baǵytynda da júrgizildi.

- Bıyl Astana qalasynda uzyndyǵy 14 shaqyrym taratý elektr jelileri rekonstrýktsııalandy. Atalǵan jelilerge 30 myńnan astam abonent qosylǵan. Sonymen qatar, Qaraǵandy oblysynda eki aýqymdy joba iske asyryldy. Atap aıtqanda, «Josaly» qosalqy stantsııasyn rekonstrýktsııalaý aıasynda syrtqy qondyrǵynyń jıyntyq taratý qurylǵysy aýystyryldy. Nátıjesinde tutynýshylardy elektr energııasymen qamtamasyz etýdiń rezervtik shemasy jasaqtaldy, - dedi ol.

Erlan Aqkenjenovtiń málimetinshe, aǵymdaǵy jylytý maýsymynyń turaqty ótýin qamtamasyz etý maqsatynda mınıstrlik mynadaı is-sharalardyń oryndalýyn uıymdastyrdy:

- elektr stantsııalaryndaǵy jóndeý jumystaryn aıaqtaý;

- energetıkalyq uıymdarda materıaldar men jabdyqtardyń avarııalyq qoryn qalyptastyrý, sondaı-aq avarııalyq brıgadalardyń tolyq jasaqtalýyn qamtamasyz etý;

- energııa kózderinde otynnyń normatıvtik qorynyń turaqty deńgeıin saqtaý.

Aıta keteıik, Erlan Aqkenjenov ákimderge óńirlerde kómirge qatysty jasandy dúrbeleń týdyrmaýdy eskertti.