Jarty ǵasyrdan astam ǵumyryn shákirt tárbıeleýge arnaǵan semeılik ustaz Eńbek Eri atandy

Semeı qalasyndaǵy №7 mektep-lıtseıdiń muǵalimi Alma Shúkejanovaǵa elimizdiń áleýmettik-gýmanıtarlyq damýyndaǵy asa úzdik jetistikteri úshin «Qazaqstannyń Eńbek Eri» ataǵy berilip, Altyn juldyz ben «Otan» ordeni tapsyryldy. Respýblıka kúnine oraı osyndaı joǵary marapatqa ıe bolǵan ustazdy Kazinform tilshisi áńgimege tartyp kórdi.

Semeıdegi № 7 bilim ordasynyń oqýshylary únemi bıikten kórinip keledi.

Sebebi ondaǵy muǵalimder shákirtteri qatarynyń aldy bolý úshin aıanbaı eńbektenip, olardy únemi qoldap otyrady.

Sol pedagogtardyń ishinde Alma Shúkejanovanyń orny bólek.

Onyń osy jaýapkershiligi mol salada mańdaı terin tógip kele jatqanyna jarty ǵasyrdan asqan.

«Matematıka páninen sabaq beremin. Jalpy jumys ótilim — 51 jyl. Onyń ishindegi sońǵy 40 jylymdy № 7 mektep-lıtseıine arnadym. Prezıdent pen Úkimet tarapynan meniń mártebeli ustazdyq eńbegim osylaı joǵary baǵalanǵanyna dán rızamyn. Shynymdy aıtsam, bul men úshin kútpegen marapat boldy. Buny ómirin balalardyń bilimi men tárbıesine arnaǵan elimizdegi búkil ustazdar qaýymyna kórsetilip otyrǵan qurmet dep bilemin», — deıdi Alma Shúkejanova.

Tájirıbesi mol ustaz balaǵa qalaı jol tabý kerektigin ábden meńgergen. Olarǵa tym qatal bolyp, jazalaǵannan góri túsinistikpen qarap, bilimge degen qyzyǵýshylyǵyn arttyrý kerektigin aıtty.

«Birinshi kezekte shákirtterimmen maqtanamyn. Alǵashqy shákirtterimniń biri Muhtar Tóleýtaev „Eńbek Eri“ atanǵan, qazir Astana qalasynyń bas onkology bolyp jumys isteıdi. Mektepti altyn medalmen bitirgen oqýshym — Arman Párimbekov AQSh-taǵy aqparattyq tehnologııalar kompanııasynyń bas dırektory. Kenjebek Ótebekov esimdi shákirtim elimizdegi qurylys kompanııalarynyń birine jetekshilik etedi. Andreı Vılkov Germanııadaǵy „MAN Truck & Bus SE“ kompanııasynda joba menedjeri. Bul kompanııa kólik jasaýmen aınalysady. Aıta bersem maqtat tutar shákirtterim kóp», — deıdi muǵalim.

Ol barsha qazaqstandyqtardy Respýblıka kúnimen quttyqtady.

«Ár shańyraqqa baqyt, qýanysh tileımin. Jumystaryńyzdyń jemisin kórip, alǵa qoıǵan maqsattaryńyzǵa jete berińizder. Eń bastysy, elimiz órkendeı bersin!», — dedi Alma Shúkejanova.