Jartasta qalyp qoıǵan: Qutqarýshylar Shymbulaq mańynan úsh jasóspirimdi taýyp aldy

ALMATY. KAZINFORM – Almaty qalasy mańyndaǵy Shymbulaq shatqalynda jartasta qalyp qoıǵan úsh jasóspirimdi Tótenshe jaǵdaılar mınıstrliginiń qutqarýshylary aman-esen evakýatsııalady.

Keshe keshke Shymbulaq mańyndaǵy taýda úsh jasóspirim óz betimen tómen túse almaı qalǵan. Jartasty jerde soqpaq jol bolmaǵanymen, geolokatsııa arqyly olardyń ornalasqan jeri anyqtalyp, baılanys úzilmegen.

- Respýblıkalyq jedel-qutqarý jasaǵynyń quramy Medeý postynan dereý oqıǵa ornyna attandy. Qutqarýshylar koordınatalar boıynsha taýǵa kóterilip, arnaıy alpınıstik quraldardyń kómegimen tik jartastardan jasóspirimderdi qaýipsiz jerge túsirdi, - delingen aqparatta.

Qutqarylǵandar – 2007 jyly týǵan eki ul jáne 2008 jyly týǵan bir qyz. Olardyń jaǵdaılary qanaǵattanarlyq, medıtsınalyq kómek qajet bolmady.

Keıin jasóspirimder qutqarý postyna jetkizilip, ata-analaryna tapsyryldy.

Qutqarýshylar taýly jerlerge shyqqanda qaýipsizdik erejelerin qatań saqtaýǵa keńes beredi.

Aıta keteıik, TJM qutqarýshylary Almaty taýynda jaralanǵan týrıstke kómek kórsetti.