Jarnamasy kúshti sabyndardyń zııany kóp bolýy múmkin
ASTANA. 21 jeltoqsan. QazAqparat - Bakterııaǵa qarsy sabyndardyń paıdasymen birge zııany da kóp bolýy múmkin. Amerıkalyq mıkrobıologtar olardyń adam gormondaryna keri áseri baryn aıtyp otyr.
Meddaily.ru-dyń habarlaýynsha, AQSh-tyń Azyq-túlik jáne medıkamentter jónindegi basqarmasy qol jýýǵa arnalǵan antıbakterııalyq zattardyń bárin teksergeli otyr. Mamandardyń aıtýynsha, mundaı ónimdi óndirýshiler olardyń aǵzaǵa qaýipsiz ekenin dáleldeýi qajet. Óıtkeni bakterııadan tazartqysh sabyndar quramyndaǵy trıklozan jáne trıklokarban zattarynyń, kerisinshe, keıbir ınfektsııalardyń tózimdiligin arttyratyny anyqtaldy. «Keıbir jańa málimetter bakterııaǵa qarsy sabyndardyń paıdasynan zııany kóp ekenin kórsetip otyr. Bakterııalardyń mundaı sabyndarǵa eti úırenip ketetini óz aldyna, sonymen birge janýarlarǵa jasalǵan synaq nátıjesinde tazartqyshtardyń gormondyq aýytqýlarǵa soqtyrýy múmkin ekeni de belgili boldy», - dep jazady «Alash aınasy» basylymy mıkrobıolog Kollın Rodjerstiń sózine silteme jasap.
