Jarnamaǵa sengen halyq kúmándi jekemenshik klınıkaǵa qaralyp, aýrýyna aýrý jamap jatyr — depýtat
ASTANA. KAZINFORM — Búgin Májilistiń jalpy otyrysynda depýtat Gúldara Nurymova qyzmeti kúmándi klınıkalar adamdardyń ómirine qandaı zııan keltirip jatqanyn aıtty.
«Byltyr Almatyda eki jasar bala kúmándi bir klınıkada emdelip jatyp kóz jumdy. Balaǵa bir mezgilde 22 preparat, 7 ret kók tamyrǵa dári jiberip, em-dom jasaǵan. Osynyń saldarynan aǵza ýlanyp, balanyń búkil ómirlik mańyzdy múshelerine zaqym kelip, jetkinshek qalalyq balalar aýrýhanasynyń jansaqtaý bóliminde kóz jumdy. Bul klınıkada kishkentaı naýqastarǵa bir mezgilde 40-qa deıin dári-dármek jazylady jáne balalardyń densaýlyǵyna orny tolmas zııan keltiretin asqynýlar jıi kezdesedi. Bul rette dárigerdiń keńesi — 200 myń teńge, massaj kýrsy — 400 myń teńge, al basqa da medıtsınalyq qyzmetterdiń baǵasy negizsiz joǵary», — dedi G. Nurymova Úkimet basshysynyń orynbasary Tamara Dúısenovanyń atyna joldaǵan saýalynda.
Bul rette ol medıtsınalyq joǵary oqý oryndarynda bolashaq dárigerlerge 5 túrli preparattan artyq bermeýge úıretetinin aıtty.
«Sondaı-aq jaqynda medıtsınalyq bilimi joq, kosmetologııa jáne plastıkalyq hırýrgııa salasyndaǵy sertıfıkaty, memlekettik lıtsenzııasy joq jalǵan dárigerdiń zańsyz plastıkalyq operatsııasynan keıin Astananyń №2 qalalyq aýrýhanasynyń jansaqtaý bólimine aýyr jaǵdaıdaǵy naýqas jatqyzyldy. Naýqasty shuǵyl ota jasaý arqyly áreń aman alyp qaldy. Al mundaı faktiler óte kóp», — dedi depýtat.
Onyń aıtýynsha, áleýmettik jelilerde medıtsına salasynda arnaıy bilimi joq kez kelgen adam ózin sala mamany, tipti dáriger retinde jarııalaı alady.
Adamdar osyndaı jarnamanyń qurbanyna aınalady.
«Joǵaryda aıtylǵandarǵa baılanysty tıisti usynystardy jarııalamaqpyn. Birinshiden, áleýmettik jelilerde medıtsınalyq qyzmet kórsetýge qatysty jarnamalardy baqylaý kerek. Ekinshiden, zańsyz medıtsınalyq qyzmetti anyqtaý boıynsha jumysty kúsheıtý mańyzdy», — dedi Gúldara Nurymova.
