«Jarna jınaýdan basqa jumysy joq» - baspasózge sholý
***
«Egemen Qazaqstan» basylymynyń jazýynsha, Sochı qysqy XXII Olımpııa oıyndarynyń bastalýyna týra bir aı merzim qaldy. Dúbirli dodaǵa alyp baratyn ýaqyt dańǵyl jolǵa tústi. Sporttyń 15 túri boıynsha 98 medaldar jıyntyǵyn sarapqa salatyn básekeniń dýyly men dabyry tym jaqynnan estile bastaǵan sııaqty. Bıylǵy sport jylynyń eń iri oqıǵalarynyń biri bolǵaly turǵan bul jahandyq jarystan qazaqstandyqtardyń da ózindik kúteri bar. «Qazaqstan sportynyń tizginin taıaýda ǵana ustaǵan jańa basshy Tastanbek Esentaev sońǵy kúnderi budan da joǵary mejeni aıtyp qalyp, abyr-sabyr kóńilimizdi erekshe eleńdetip qoıdy. Mundaıda «jaqsy sózdiń jarym yrys» ekenin bildirgen tóraǵaǵa «aýzyńa - maı, astyńa - taı» deý ǵana kerek shyǵar. Al onyń paıymynsha, Qazaqstan sportshylary osy joly artyq-kemi joq 6 medal alyp qaıtýlary kerek. Baıannyń batyl aıtylǵany aqıqat. Ol osy arqyly elimiz sańlaqtarynyń osyǵan deıingi 5 Olımpıadada alǵan barlyq júldeleri sany bir-aq qaıtalanatynyn bildirip otyr»,-dep jazady maqala avtory. Bul týraly «Vankýver - Sochı» atty maqaladan oqı alasyzdar.
Bas basylymnyń jazýynsha, Elbasy Nursultan Nazarbaev Almatydaǵy «Ýnıversıada-2017» nysandarynyń daıyndyq barysymen jáne «Kókjaılaý» taý shańǵysy kýrortynyń jobasymen tanysty. Memleket basshysyna barlyq maýsymǵa arnalǵan «Kókjaılaý» taý shańǵysy kýrortyn damytý tujyrymdamasy tanystyryldy. Nursultan Nazarbaev barsha qazaqstandyqtardy Jańa jylmen taǵy da quttyqtap, kózdelgen barlyq josparlardyń tabysty iske asyrylýyna tilektestigin bildirdi. Memleket basshysy Almaty oblysy jáne jalpy elimiz úshin týrızm ındýstrııasynyń mańyzdylyǵyn atap ótti.
- Búgin men taý týrızmin damytý salasyndaǵy álemniń kórnekti mamandarynyń usynystaryn qarap shyqtym. Qazirdiń ózinde Shymbulaq taý shańǵysy kesheni myńdaǵan qazaqstandyqtyń salamatty ómir saltyn ustanýyna múmkindik beredi. Jańa taý shańǵysy kýrortynyń jobasy búkil elimiz úshin mańyzdy bolyp sanalady. Almatyda jáne oblysta týrızmdi damytý 100 myńǵa jýyq qosymsha jumys ornymen qamtamasyz etýge múmkindik beredi. Qalanyń qarqyndy damýy taýlarymyzdy utymdy paıdalanýǵa baılanysty bolmaq. Eýropanyń kóptegen elinde adamdar kishkentaıynan sporttyń qysqy túrimen aınalysady. Taý shańǵysy kýrortyna baratyn týrıst jyly jáne teńizi bar elderge baratyn týrısterge qaraǵanda 6 ese kóp kiris ákeledi. Eger biz osy baǵyttaǵy týrıstik salany damytatyn bolsaq, onda myńdaǵan jumys ornyn ashyp, kóp mólsherde, sonyń ishinde tabıǵat qorǵaý salasyna ınvestıtsııany kóbirek tartatyn bolamyz. Tek Shymbulaq kesheni ǵana emes, oblystaǵy basqa da oryndar paıdalanylatyn bolady jáne bul rette tabıǵat óz kórik-kelbetin saqtap qala beredi, - dedi Qazaqstan Prezıdenti. Osy jaıyndaǵy maqala «Taý shańǵysy túsiretin tabys shash-etekten» degen taqyryppen berilgen.
***
«Kazahstanskaıa pravda» basylymynyń búgingi sanynda «V troıke bestsellerov» degen materıal basylǵan. Gazettiń jazýynsha, otandyq «Meloman» kompanııasy ótken jyldyń qorytyndysy boıynsha Qazaqstanda eń kóp satylatyn kitaptardyń reıtıngin jarııalady. Bestsellerlerdiń úshtigine qazaqstandyq tarıhshy Radık Temirǵalıevtiń «Aq Orda. Qazaq handyǵynyń tarıhy» týyndysy enip otyr.
Osy basylymnyń jazýynsha, Pavlodar oblysynda azamattardyń qarýdy óz erkimen tapsyrý aktsııasynyń nátıjesinde polıtsııaǵa 559 dana tirkelmegen qarý tapsyryldy. Onyń ishinde 479-y tegis uńǵyly myltyqtar, vıntovkalar, sholaq myltyqtar, travmatıkalyq qarýlar jáne 30 myń dana oq bar. Atalǵan oblystyń ІІD baspasóz qyzmetiniń habarlaýynsha aktsııany ótkizý barysynda halyqqa jalpy 16 mıllıon teńgeden astam qarjy tólendi. Bul aqparat «Sdal orýjıe - polýchıl dengı» degen taqyryppen berilgen.
***
«Egemen Qazaqstan» gazetiniń búgingi sanynda «Jarna jınaýdan basqa jumysy joq» degen maqala jarııalandy. «Gazetimizdiń 2013 jylǵy 26 jeltoqsan kúngi nómirinde jaryq kórgen jýrnalıst Jylqybaı Jaǵyparulynyń «PIK - kúrmeýi kúrdeli kooperatıv» atty maqalasy jer-jerde úlken qoǵamdyq pikirler týǵyzýda. Maqala jaryq kórgen kúnniń erteńine Astana qalasynyń ákimi Imanǵalı Tasmaǵambetov óziniń BAQ ókilderimen jyl aıaǵynda ótetin dástúrli kezdesýinde bul ózekti máselege erekshe toqtalyp, izinshe qalalyq gazetterdiń osy maqalany kóshirip basýyna muryndyq boldy. Jańa jyldyń alǵashqy kúnderinde-aq gazet poshtasyna aǵylyp kelip jatqan oqyrman hattary da kópshilik múddesine tikeleı qatysty bul ózekti jaıdyń eshkimdi beıjaı qaldyrmaı otyrǵandyǵyn kórsetedi»,-dep jazady basylym. Osy oraıda maqala avtory Qaraǵandy oblysynan kelgen pikirlerdi kópshilik nazaryna usynyp otyr.
