Jármeńkege shyǵarylǵan ónim qalalyqtardyń bir kúndik azyǵy - I.Tasmaǵambetov
ASTANA. QazAqparat - Astana turǵyndary kúnine 1800 tonna azyq-túlik tutynady. Bul týraly búgin elordanyń ortalyq alańynda ótip jatqan Pavlodar men Jambyl oblysy aýyl sharýashylyǵy ónimderiniń jármeńkesin aralap shyqqan Astana qalasynyń ákimi Imanǵalı Tasmaǵambetov aıtty.
«Astanada kúzde dástúrli túrde ótetin jármeńke óz jalǵasyn tabýda. Ózderińiz de biletindeı, ótken senbide Almaty oblysy ádemi jármeńkesin ótkizgen bolatyn. Endi mine, elimizdiń 2 úlken aımaǵy Pavlodar men Jambyl oblysy ózderiniń jármeńkesin ótkizýde.
Jańbyr jaýyp tursa da halyqtyń sany óte kóp ekenin ózderińizde baıqadyńyzdar. Óıtkeni, qala turǵyndary árbir senbi kúni elimizdiń túrli óńirleri osyndaı jaqsy jármeńke ótkizetindigine úırengen», - dedi I.Tasmaǵambetov. Qala basshysynyń sózine qaraǵanda, jármeńkede saýdalanyp jatqan azyq-túlik ónimderiniń baǵasy elorda bazarlarynan orta eseppen alǵanda 20 paıyzǵa tómen. Al eki oblystyń alyp kelgen azyq-túliginiń kólemi 1200 tonnany quraıdy. «Aıta keteıin, jalpy, astanalyqtar kúnine 1800 tonna azyq-túlik tutynady. ıAǵnı, jármeńkege shyǵarylǵan ónimdi qalalyqtardyń bir kúndik azyǵy desek te bolady», - dedi ol.
Aıta keteıik, jermeńkeni Astana ákimimen birge Aýyl sharýashylyǵy mınıstri Asyljan Mamytbekov, Pavlodar oblysynyń ákimi Qanat Bozymbaev aralap shyqty.
