Jármeńkede bir buıym ótse, soǵan qýanamyz — qolónershi
QYZYLORDA. KAZINFORM — Qyzylorda turǵyny Kúlsin Arzymbetova — arbaǵa tańylǵanyna qaramastan synaqqa esh moıymaǵan jan. Kerisinshe ózin damytýǵa, qoǵamǵa paıdaly bolýǵa tyrysady.
Ol mektepti aýyldyq jerde 1976-1986 jyldary támamdaǵan. Qolónerge qyzyǵýshylyǵy oqýshy kúninde bastalǵan. Alǵashynda toqýmen aınalysyp, keıin bul ónerdi odan ári jetildirýge talpyndy. Oblys ortalyǵyna kóshkennen keıin «Syr sheberleri» tobymen birge túrli jármeńkeler men kórmelerge qatysyp júrdi.
— 2020 jyly «Damý» qory tigin mashınasyn syıǵa tartty. Sol kezden bastap tigin tigýdi úırenip, kásibimdi keńeıtýge múmkindik týdy. Alǵashqy ustazym — Qyzylordadaǵy «Alaman quraq» qozǵalysynyń belsendisi Úrjamal Dúısenálıeva. Ol kisiden quraq quraýdyń qyr-syryn meńgerip, keıin óz betimshe túrli tapsyrystardy oryndaıtyn boldym. 2023 jyly áleýmettik dárejesine qaraı beriletin qaıtarymsyz memlekettik grantty ıelendim. Grant qarjysyna qajetti qural-jabdyqtar satyp alyp, kásibimdi damyttym. Búginde túrli buıym tigip, tapsyrys qabyldaımyn, — dedi Kúlsin Arzymbetova.
Degenmen, múgedektigi bar adamdarǵa arnap uıymdastyrylatyn jármeńkelerde saýda qyzý júrmeıdi eken. Adamdar kóp jaǵdaıda buıymdardy tek tamashalap ketedi eken. Kóz maıyn taýysyp eńbektengen sheber bir zat satylsa, soǵan qýanyp qalady.
— Men úshin úlken mektep bolǵan jobalardyń biri — «Alaman quraq». Bul joba týraly alǵash ret áleýmettik jeliden kórip, 2023 jyly qatysýǵa sheshim qabyldadym. Sol jyly Qyzylorda oblysynan 13 adam qatysyp, bizge Qúlaıhan Baıjanova jetekshilik etti. 2024 jyly Astana qalasynda ótken V Dúnıejúzilik kóshpendiler oıyndarynyń ashylý saltanatyna qatysý baqyty buıyrdy. Qazaqstannyń túkpir-túkpirinen jınalǵan 400 quraqshy taıqazan mańyna ulttyq naqyshtaǵy kórpelerdi jaıyp, qazaq qolóneriniń áleýetin pash etti. Al ótken jyly Almatydaǵy «Medeý» muz aıdynynda ótken is-sharada elimizdiń 17 óńirinen kelgen 660 quraqshy bas qosyp, Gınnes rekordyn ornattyq. Bul — biz úshin úlken maqtanysh, — deıdi qolónershi.
«Alaman quraq» jobasy bıyl Óskemende burynǵydan da aýqymdy deńgeıde ótti. 780 quraqshy bir mezette «Barqyt bel» kórpesi men jylqy jastyǵy arqyly taǵy bir rekordqa qol jetkizdi. Mádenı muramyzdy saqtap, álemge tanytýdyń biregeı bastamasyn Nurgúl Abaıhan abyroımen júzege asyryp júr.
— «Alaman quraqtyń» bereri óte kóp. Bul joba úıde otyrǵan úlkenderdi, jas analardy, mektep oqýshylaryn bir arnaǵa toǵystyrady. Qatysýshylar jańa dostar taýyp, tájirıbe almasady, sheberlik sabaqtaryna qatysady. Eń bastysy, eńbegi elenip, marapatqa ıe bolady. Bul adamdarǵa erekshe qýanysh syılaıdy, — deıdi ol.
Qolynan keletin isti jan qalaýyna aınaldyrǵan Kúlsin Arzymbetova mundaı múmkindikti taǵdyrdyń syıy dep qabyldaıdy. Ózi sııaqty qoǵammen aralasqysy keletin, óner arqyly damýdy qalaıtyn taǵdyrlas jandardy eshteńege qaramastan alǵa jyljýǵa úndeıdi. Ómir jolynda kezdesetin túrli kedergini eńserip, jaryqqa umtylý adamnyń erik-jigerine baılanysty dep esepteıdi.
Eske salaıyq, bıyl 7 shildede elimizde alǵash ret Qolónershiler kúni atalyp ótedi. Bul kún ulttyq qolónerdiń qoǵamdaǵy ornyn aıqyndap, ǵasyrlar boıy úzilmeı jalǵasqan sheberlik dástúrine qurmet ispetti.
