«Jarqyra, jaına, Astana!» jyr músháırasynyń bas báıgesi - jeńil avtokólik S. Turǵynbekovke buıyrdy
ASTANA. 21 maýsym. QazAqparat - Elorda ákimdiginiń qoldaýymen Astana qalasynyń 15 jyldyq merekesi qurmetine oraı Sáken Seıfýllın murajaıy jáne Qazaqstan Jazýshylar odaǵynyń Astana qalalyq fılıaly jarııalaǵan respýblıkalyq jyr báıgesine elimizdiń ár óńirinen,
alys-jaqyn sheteldegi qandastarymyzdan - barlyǵy 70-ke tarta shyǵarma kelip túsken.
Bul týraly Astananyń 15 jyldyǵyn ázirleý men ótkizý jónindegi uıymdastyrý komıtetiniń medıa toby habarlady.
Astanada osymen úshinshi márte ótip otyrǵan bul múshaıraǵa óleń óneriniń nebir óreli júırikteri qatysty. Báıgeniń basty maqsaty - Táýelsiz Qazaqstannyń azat Astanasyn jan-jaqty jarqyrata jyrlaý.
Alash syılyǵynyń ıegeri, aqtanger aqynymyz Serik Aqsuńqaruly tóraǵalyq etken, belgili qalamgerlerden quralǵan qazylar alqasy báıgege túsken shyǵarmalardyń barlyǵyn talǵam tarazysynan ótkizdi. Sonyń ishindegi eń bir súbelisi Serik Turǵynbekovtyń «Astana - Dastan» atty óleńder tsıkli boldy. Budan buryn da talaı múshaıralardyń júldesin qanjyǵasyna baılaǵan Serik aqyn bul joly tipti kósile túsipti.
Sondaı-aq, jan súısintken shyǵarmalar aryndy aqyn Baýyrjan Jaqyptyń «Astanamen syrlasý» óleńder toptamasy men taıaýda Qaraqalpaqstannan kóship kelgen qandasymyz Mahset Alseıtovtyń «Astana jyrlary» boldy. Qazaq jyrynyń tarlanbozy, ardager aqynymyz Kákimbek Salyqov ta múshaıra kútken bıikten kórine bildi. Aqyn aǵamyz Astana toıyna arnap tutas bir kitap jazyp bitiripti. Sol eńbeginen báıgege tańdap usynǵan bir top óleńi Astana ajaryn jarqyrata ashqandyǵymen kóńilden shyqty. Sondaı-aq, talantty aqyn qyzymyz Sáýle Dosjanova da Astana taqyrybyn ádemi ıgere bilipti.
Sonymen, qazylar alqasy aqyldasa kele, bas báıgeni (jeńil avtokólik) Serik Turǵynbekovtiń «Astana - Dastan» óleńder toptamasyna berýdi jón kórdi.
Birinshi oryndy «Astanamen syrlasý» óleńderimen oza shapqan Baýyrjan Jaqyp qanjyǵasyna baılady.
Eki ekinshi júldeni «Mereı toıyń qutty bolsyn, Astana!» jáne «Astana sýretteri» óleńder toptamalary úshin Kákimbek Salyqov pen Sáýle Dosjanova enshiledi.
Úshinshi úsh syılyqqa Mahset Alseıtov, Janat Áskerbekqyzy, Erlan Júnis laıyq dep tabyldy.
Al yntalandyrý syılyqtaryn Abylaı Tolybaev, Maǵıza Qunapııaqyzy, Aýyt Muqıbek, Roza Seıilhan, Qaırat Sabyrbaı ıelendi.
Júldegerlerdi marapattaý rásimi 2013 jyldyń 1 shildesi kúni Astana qalasy Kongress-Holl saraıynda ótedi.
