Jarqynaı Hanaıymnyń áni de, beınebaıany da kóshirme me? - VIDEO
ASTANA. QazAqparat - Prodıýser Baıan Esentaeva qol astyndaǵy Jarqynaı Hanaıym esimdi jańa ánshini tanystyrdy.
Jarqynaı "Jandy daýys" jobasyna qatysýy kezinde prodıýserdiń kózine túsken. Ánshiniń "Mahabbatym" atty ánine túsirilgen tuńǵysh beınebaıanynyń tusaýkeserine oraı prodıýser óner adamdarynyń basyn qosty. Kópshilik ánshiniń debıýtinen tyń dúnıe, jańalyq kútti. Buǵan deıin birqatar BAQ "Esentaeva Janardy basyp ozatyn ánshini daıyndap jatyr" dep jarııaǵa jar salǵan bolatyn. Alaıda, Jarqynaı Shalqarovanyń debıýti uqsastyqtar jaıly kóptegen áńgimelerge túrtki boldy.
Atap aıtqanda, ánshiniń túrin Baıan Esentaevanyń sińlisi Baǵym Muhıtdenovaǵa uqsatsa, tuńǵysh beınebaıanyn Reseı ánshisi Valerııanyń qyzy Anna Shýlgınanyń "Nojevaıa" ánine túsirilgen beınebaıanynyń epızodtaryna uqsatty. Al áýeni Mehmet Djemal Eshılchaıdyń "Secret garden" týyndysynyń kóshirmesi bolyp shyqty, dep jazady baistars.kz.
Degenmen, Baıan Esentaeva osy tektes syndarǵa eti ábden úırengenin meńzep, shákirtin de daıyn bolýǵa shaqyrdy. "Daǵdarys - naǵyz ónerlilerdi shyǵaratyn ýaqyt. Biz úsh notaly ánderden ábden jalyǵyp, eki oktavany saǵyndyq! Ózińe bekem bol, áli talaı syn aıtylyp, kóp adam moıyndamaıdy, tas laqtyrady... Tek júrekten shyqqan án ǵana tyńdarmannyń qulaǵyna jetedi. Buǵan bizdiń tabandylyǵymyz ben senimimiz kómektesedi!" - dep Jarqynaı Shalqarovany úlken óner álemine qadam basýymen quttyqtaǵan prodıýser plagıat jaıly áńgimelerge túsinik berdi. "Dostar! "Mahabbatym" jańa ánimizge qatysty kishigirim aqparat, bul norvegııalyq kompozıtor Rolf Lovlandtyń skrıpkalyq týyndysy, biz álemdik klassıkany án janrynda usyndyq!" - dep jazdy Baıan Esentaeva.
