Jarqyn jaz óskeleń urpaqqa qamqorlyqtyń sımvolyna aınalǵan osy merekeden bastalady - Prezıdent
ASTANA. KAZINFORM – Memleket basshysy Qasym-Jomart Toqaev Halyqaralyq balalardy qorǵaý kúnimen quttyqtady.
«Qurmetti otandastar!
Barshańyzdy Halyqaralyq balalardy qorǵaý kúnimen quttyqtaımyn! Jarqyn jaz óskeleń urpaqqa qamqorlyqtyń sımvolyna aınalǵan osy merekeden bastalady.
Ul-qyzdarymyzdyń parasatty jáne jan-jaqty bolyp ósýine jaǵdaı jasaý, jas azamattardyń quqyǵyn qorǵap, densaýlyǵyn saqtaý árdaıym memlekettiń basty basymdyǵy sanalady. Balalar — bizdiń bolashaǵymyz. Sondyqtan elimizdegi árbir jetkinshektiń meıirim men qamqorlyqqa bólenip, úlkenniń qoldaýyn sezinýi, erteńgi kúnge senimmen qaraýy óte mańyzdy.
Men jas urpaq Ádiletti Qazaqstannyń negizgi qaǵıdattaryn naqty júzege asyryp, «Adal azamat» tujyrymdamasynyń ozyq ıdealdaryna tolyq saı bolady dep senemin. Ol úshin biz búkil qoǵam bolyp jalpyulttyq qundylyqtarymyzdy urpaqtyń boıyna sińirýimiz jáne olardy eńbekqorlyq pen bilimpazdyqqa baýlýymyz kerek. Sondaı-aq tól tarıhymyz ben mádenıetimizdi qurmetteýge úıretýimiz qajet.
Barlyq bala ata-anasy men jaqyndaryn oqýdaǵy, shyǵarmashylyq saladaǵy jáne sporttaǵy jetistikterimen, jaqsylyq pen jasampazdyqqa umtylysymen qýanta bersin!
Barshańyzǵa zor densaýlyq, baq-bereke, tolaıym tabys tileımin!» — delingen Prezıdent quttyqtaýynda.
